Хадгаламж зээлийн хоршооны Ж.Мэндбаяр хөрөнгөө нэхэмжилэв

“Глоб кредит” хадгаламж зээлийн хоршооны дарга асан Ж.Мэндбаяр өнгөрсөн даваа гарагт мэдээлэл хийлээ.Түүний хувьд бусдаас хадгаламж авах, бусдад орон сууц барьж өгөх, бонд худалдах нэрийдлээр залилан хийсэн зэрэг хэрэгт буруутгагдан 10 жилийн чанга дэглэмтэй хорих ялаар шийтгүүлсэн.

“Глоб Кредит” хадгаламж зээлийн хоршоо, “Хохирогчдын холбоо”-ноос хийсэн  хэвлэлийн хурлын үеэр Ж.Мэндбаяр “Миний хөрөнгийг дуудлага худалдаанд оруулахдаа хэд дахин багаар үнэлсэн. Дөрвөн давхар барилгыг ганцхан өрөөнийх нь хэмжээгээр үнэлэхээс эхлээд олон асуудал бий.Тиймээс сураггүй болсон хөрөнгөө одоогийн зах зээлийн үнээр үнэлүүлж, төлүүлэх хүсэлтэй байна” гэсэн юм.

Түүний хэлж буйгаар 2006 онд хуучнаар тус хадгаламж зээлийн хоршоо байсан байрыг дөрвөн тэрбум 420 сая төгрөгөөр үнэлсэн.Гэтэл хоёр жилийн дараа анхны дуудлага худалдааг явуулахдаа 3.2 тэрбум төгрөг болгон бууруулсан.Уг нь анхны үнэлсэн үнээр худалдах учиртай байсан талаар мэдээлэв.

Хөгжлийн банк нийтлэлчдэд 40 гаруй сая төгрөг өгсөн нь ил болов

Монголын томоохон нийтлэлчдийн нэгдэл болох “Шилдэг нийтлэлчдийн клуб” буюу www.baabar.mn сайт Монгол улсын Хөгжлийн банкнаас их хэмжээний зардлыг гаргуулан авсан талаар мэдээлэл олны сонорт хүрлээ.Хөгжлийн банкнаас МҮОНРТ-рүү 18.200.000 төгрөг болон “Шилдэг нийтлэлчдийн клуб”-д 2/101 тоот гэрээний 40 %-ийн урьдчилгаа төлбөр хэмээн 19.872.000 төгрөгийг өгсөн тухайгаа өөрсдийн Шилэн дансандаа мэдээлсэн байна.Мөн энэ оны 2 сард “Монголын Шилдэг нийтлэлчдийн клуб”-д Хөгжлийн банкнаас Олон нийтэд мэдээлэл хүргэх үйл ажиллагааны төлбөр хэмээн 24.840.000 төгрөгийг нэмж төлжээ.

 Улс төр, нийгэм эдийн засгийн томоохон асуудлыг ард иргэдэд дэлгэн гаргадаг тус клуб ийнхүү их хэмжээний мөнгийг авсан нь томоохон асуудлуудыг нуун дарагдуулж байна гэсэн хардлага мэдээлэл цахим ертөнцөөр цацагдаж эхэллээ.

Ийнхүү олон нийтийн бодол санааг чиглүүлж байдаг шилдэг нийтлэлчид мөнгө авч нийтлэл бичдэг гэдэг нь олон хүнд таалагдсангүй. Харин өчигдөр Хөгжлийн банкны захирал Ж.Мөнхбат мэдээлэл хийж “Телевизүүд болон нийтлэлчдийн клубтэй ямар ч хаалтын гэрээ хийгээгүй. Энэ бол үйл ажиллагаагаа сурталчилах зорилготой зүйл юм” гэж тайлбарласан юм.

Цэрэг татлага эхэллээ

Энэ оны цэргийн жинхэнэ албаны нэгдүгээр ээлжийн татлагыг энэ сарын 8-10-ны өдрүүдэд  зохион байгуулж байна. Цэргийн зарлан дуудах хуудсыг 18-25 насны залуучуудад 93.6 хувьтай тараасан бөгөөд зарлан дуудах хуудсаа авсан иргэд иргэний үнэмлэх, цэргийн  үүрэгтний үнэмлэх, эрүүл мэндийн болон нийгмийн даатгалын дэвтэр, 3х4 хэмжээний 2 ширхэг зураг зэрэг холбогдох материалаа бүрдүүлж, дуудагдсан цэрэг татлагын байрандаа очих юм. Мөн төрөл бүрийн мэргэжил эзэмшсэн тухай мэргэжлийн үнэмлэх, сургууль төгссөн дипломоо авч очно.   
Монгол Улсын "Иргэний цэргийн үүргийн болон цэргийн албан хаагчийн эрх зүйн байдлын тухай хууль",  Засгийн Газрын 2008 оны 194 дүгээр тогтоолын дагуу цэргийн албыг сайн дурын үндсэн дээр гэрээгээр хаах хүсэлтэй 29 хүртэлх насны цэргийн алба хаасан иргэдийг сонгон шалгаруулалтаар элсүүлж, Зэвсэгт хүчний цэргийн ангиудад алба хаалгах юм. 
            Дүүргүүдийн цэрэг татлагын байр 
•    Баянгол дүүрэг - “Оюуны ундраа” /96-р дунд сургууль/ цогцолбор
•    Баянзүрх дүүрэг - 53-р дунд сургууль
•    Сүхбаатар дүүрэг - 31-р дунд сургууль
•    Сонгинохайрхан дүүрэг - “Ирээдүй” / 83-р дунд сургууль/ цогцолбор
•    Хан-Уул дүүрэг - 34-р дунд сургууль 
•    Чингэлтэй дүүрэг - 24-р дунд сургууль

Ерөнхийлөгч Ц.Элбэгдорж ОХУ-д айчилж, ялалтын баярт оролцож байна

Монгол Улсын Ерөнхийлөгч Ц.Элбэгдорж ОХУ-ын Ерөнхийлөгч В.В.Путины урилгаар энэ долоо хоногт ОХУ-ыг зорьж, Аугаа их ялалтын 70 жилийн ойд оролцож байна. Тавдугаар сарын 6-9-ний хооронд үргэлжлэх манай улсын төрийн тэргүүний айлчлалын хүрээнд Москва хотноо сурч буй Монгол  оюутнуудын төлөөлөлтэй уулзах, Аугаа их ялалтын 70 жилийн ойд зориулан Монголын ард түмнээс Оросын ард түмэнд бэлэглэж буй “Ялалтад тэмүүлсэн морьд”-ын хөшөөг танилцуулах зэрэг ёслолын арга хэмжээ боллоо. Мөн Монгол Улсын Ерөнхийлөгч Цахиагийн Элбэгдорж, Оросын Холбооны Улсын Ерөнхийлөгч В.В.Путин нар ганцаарчилсан уулзалт хийж, зоог барьсан.
Ганцаарчилсан уулзалтын дараа хоёр орны төрийн тэргүүн эдийн засаг, дэд бүтцийн салбар, хоёр орны цаашдын хамтын ажиллагаа, гурван талт уулзалт зэрэг өргөн сэдвээр ярилцсан байна. Түүнчлэн айлчлалын хүрээнд Монгол Улсын Ерөнхийлөгч Цахиагийн Элбэгдоржид Евразийн 
С.Е.Донской нар бараалхав.

Г.Бат

Эх сурвалж: ZAluu.com