Цөмийн энергийн газрыг татан буулгаж гол үүргийг нь цөмийн энергийн комисст нэгтгээд байгаа билээ. Тэгвэл энэ комиссын  ажлын албаны даргаар Г.Манлайжав гэгч нөхөр ажиллах сурагтай. Тэрбээр урьд нь нэлээд хэл аманд өртөж явсан нэгэн гэдгийг зарим нь мэдэх байх. Хуучин Цөмийн энергийн газарт ажиллаж байхдаа ураны лицензийг бусдад хууль журам зөрчин олгуулсан тухай гурав, дөрвөн жилийн өмнө хэвлэлүүд бичиж байлаа. Мөн саяхан Олон улсын арбитрын шүүхийн шийдвэрээр “Хан ресурс” компани  Монголд ураны лиценз эзэмшин  үйл ажиллагаа явуулж байсан үеийнхээ хохиролд  манай Засгийн газраас 100 сая ам.долларын нөхөн төлбөр гаргуулж авахаар болсон. Зарим  эх сурвалжууд  тус компани 100 сая ам.долларынхоо хүүг нэмж төлөх юм бол 200 орчим сая  ам.доллар авна гэж байгаа. Эдийн засаг, санхүүгийн хувьд тамирдсан манай улсын хувьд энэ бол хүнд ачаа болж байна. Гэтэл улс орондоо ийм их хохирол учруулсан эздийн талаар юу ч дуугарахгүй байгаа нь анхаарал татаж буй. Энэ хэрэгт урьд нь Цөмийн энергийн газрын даргаар ажиллаж байсан Энхбат, одоо Цөмийн энергийн комиссын ажлын албаны дарга гэсэн төрийн сэнтий рүү зүтгэж яваа Г.Манлайжав нар ямар нэг хэмжээгээр холбоотой гэж байна.

Б.Отгон

Эх сурвалж: Tumen.mn