Бэлгийн замын халдварт өвчин улам нэмэгдэж байна. ДОХ-той монголчууд хэмээн дэлхий даяар зарлагдаж буй. Энэ өвчнийг эмчлэх хөрөнгө мөнгийг манайх улсын төсвөөсөө 100 хувь дааж бараг үзээгүй. Эдийн засаг санхүүгийн чадамж муугаас болоод дандаа гаднаас тусламж дэмжлэгтэй “амь зогоож” байлаа. Одоо ч энэ л хэвээрээ. Тэгвэл сүүлийн жилүүдэд нийт халдварт өвчний  43 хувийг бэлгийн замын халдварт өвчин эзлэх болжээ. Тэр дундаа тэмбүүгээр өвчилсөн хүний тоо эрс өсөх хандлагатай байна. Өнгөрсөн онд  гэхэд ийм өвчтөн 417-гоор нэмэгджээ.  Энэ  оны эхний улирлын байдлаар тэмбүүгийн өвчлөл  17.5 хувиар өслөө. Улсын хэмжээнд  нийт тэмбүүгээр өвчлөгсдийн 30 орчим хувийг жирэмсэн эмэгтэйчүүд эзлэх болжээ. Энэ бол  аюулын  дохио гэж мэргэжилтнүүд хэлж байна. Өнгөрсөн оны 12 дугаар сард манай сайт 3 сая дахь  иргэний  тухай урьдчилж  мэдээлэхдээ “тэрхүү шинээр мэндлэгсдийн   хэд нь төрөлхийн тэмбүү өвчтэй байх бол” гэсэн асуудал дэвшүүлж байсан юм. Үүнд зарим уншигчид “Муу ёрлоод” хэмээн дургүйцсэн ч байж  магадгүй. Гэхдээ үнэний хувьтай гэдэгт  одоо эргэлзэх хэрэггүй болов бололтой. Бид одоо ингээд л “Тэмбүүтэй монголчууд” болцгоох уу. Үгүй байлтай. Эмчлэх бүх талын арга хэмжээг ХӨСҮТ-ээс зохион байгуулах гэж оролдож байх шиг байна. 2008-2013 онд “Нэг цэгийн үйлчилгээ” төслөөр нийслэлийн бараг бүх дүүрэгт энэ өвчний эсрэг эмчилгээ сувилгаа хийсэн. Гэвч үр дүн муутай байна. Гэхдээ үүнийгээ цааш үргэлжлүүлэн хэрэгжүүлэхдээ Сонгинохайрхан, Баянзүрх дүүрэгт онцгойлж анхаарах ажээ. Хамтран  амьдрагчдын дунд тэмбүүг илрүүлэх, эмчлэх, урьдчилан сэргийлэх ажлыг  хийхээр болсон байна. Үр дүн яаж гарахыг харин таах аргагүй.

Б.Баяр 

Эх сурвалж: Tumen.mn