АНУ, Хятад хоорондын худалдааны дайн дэлхийн зах зээлд сүйрэлт уршиг тариагүй ч олон улсад худалдааны шинэ боломж бүрдүүлснийг Америкийн арилжааны бус, хувийн байгууллага болох Эдийн засгийн судалгааны үндэсний товчоо болон Дэлхийн банкны шинжээчид тодруулжээ. Нефтийн бус томоохон экспортлогчид дэлхийн бусад орон болон Америк руу экспортоо нэмэгдүүлж, зөвхөн Хятадад нийлүүлэхээ багасгасан гэнэ.

Үүний сацуу гадаадын шууд хөрөнгө оруулалт их, гэрээний дагуу экспортын эзлэх хувь өндөртэй орнууд гадаад худалдаагаа бусадтай харьцуулахад илүү нэмэгдүүлжээ. 2014-2019 оны дэлхийн худалдааны сар тутмын мэдээлэлд мэргэжилтнүүд дүн шинжилгээ хийсэн аж. Үүнд нефть экспортлогчдыг оруулахгүйгээр АНУ, Хятад зэрэг гадаад худалдаагаар тэргүүлэгч 50 орны мэдээлэл багтжээ.

Тэдгээр нь дэлхийн худалдааны 95.9 хувийг эзэлж байна. Үүний сацуу судлаачид худалдааны урсгалыг экспортоор бус, улс орнуудын импортын мэдээлэлд үндэслэн хэмжсэн байна. Ингэхэд АНУ, БНХАУ-ын хоорондох худалдааны мөргөлдөөн дэлхийн худалдаанд хэт их хохирол учруулаагүй нь тогтоогджээ. 48 улс (АНУ, БНХАУ, нефть экспортлогч орнуудаас бусад гол экспортлогчид) экспортоо дунджаар АНУ руу нэмэгдүүлж, БНХАУ руу бууруулж, дэлхийн бусад улстай хийх худалдаагаа мэдэгдэхүйц ихэсгэсэн аж. Худалдааны дайн дэлхийн 19 орны экспортыг эрс нэмэгдүүлж, зөвхөн нэг улсынхыг бууруулсан гэнэ. Ерөнхийдөө худалдааны дайн нь арилжаа наймааны урсгалыг дахин хуваарилаад зогсохгүй дэлхийн худалдааны өсөлтөд саад болоогүйг уг судалгаа харуулжээ. Үнэ тарифыг бууруулах дэлхийн урт хугацааны чиг хандлага бүрэн өөрчлөгдсөн ч экспортын өсөлтөөр хэмжигдэх даяаршил зогсоогүй бололтой.

Unuudur.mn