"Шинэ үе” продакшны дэлгэцийн тав дахь бүтээл “Хөгжилтэй өдөр” инээдмийн уран сайхны кино нээлтээ хийгээд удаагүй байна. Киноны ерөнхий найруулагч Н.Ариунболд ажилласан бөгөөд “Манай хамтлагийнхан тодорхой шалтгааны улмаас уран бүтээлээсээ хэсэг хугацаанд завсардлаа. Харин одооноос бүгд цугларч уран бүтээлдээ эргэн орж байна. Энэ удаагийн бүтээлд маань бүрлээч /Т.Билгүүн/ гол дүрд нь тоглосон. Өнөөдрийн энэ үйл ажиллагаанд дүүгийн маань орон зай их үгүйлэгдэж байна. 

Гэвч тэнгэрээс талийгаач маань харж байгаа гэдэгт итгэлтэй байна. Иймд энэ киноны маань гол дүрд тоглосон бүрлээчийнхээ ар гэрийнхэнд хүндэтгэл үзүүлье” хэмээн киноныхоо нээлтийн үеэр мэдэгдсэн байдаг. Тэрбээр “Хөгжилтэй өдөр” инээдмийн киноныхоо талаар “Кино маань өөрөө цагаанхан, инээдмийн кино учраас үзэгчид түмэнд маань аз жаргал бэлэглэнэ гэдэгт итгэлтэй байгаа. Өнөөдөр манай нийгэмд өнгө, мөнгөний амьдрал их давамгайлж байна. Хүмүүс нэр алдар, баян чинээлгийн төлөө амьдардаг болсон байна. Манай киногоор хүний сэтгэл, залуусын хайр сэтгэл тэр бүхнээс илүү хүчтэй гэдгийг илэрхийлсэн. Энэ кинод дөрвөн залуугийн хайр сэтгэлийг гаргасан” хэмээн онцолсон юм.