Төрийн төсөвтэй холбоотой албан тушаалуудыг мэргэжилтэнээс эхлээд хашиж хөрөнгөжсөн эрхэмүүдийн нэг бол УИХ-ын гишүүн Ц.Даваасүрэн. 1995 оноос Сангийн яамны Валютын харилцааны газарт мэргэжилтэн 2000 оноос Сангийн яамны Эдийн засгийн бодлогын газрын дарга, 2005 оноос Санхүү, эдийн засгийн яамны Төрийн сангийн газрын дарга, 2008 оноос БСШУЯ-ны Санхүү эдийн засгийн газрын дарга, 2012 оноос УИХ-ын Төсвийн байнгын хорооны даргазэрэг ажлыг хийж явсан түүнийг төрөөс төрсөн тэрбумтан гэхэд хэн ч маргахгүй.
Улс төрд орж ирсэн зам нь маш дардан. 2008 онд Хөвсгөл олон тойрогтой байлаа. Ардын намын буянд гараад ирсэн. 2012 онд бие даан нэр дэвшсэн. Тэр жилийн сонгуульд Хөвсгөлд хүчтэй өрсөлдөөн бараг л болоогүй. АН-аас торойчих хүнгүй, Л.Гүндалайгийн нэр хүнд уначихсан, МАН-аас гарчих байх гэж байсан Ашигт малтмал газрын тосны газрын дарга Б.Батхуяг шоронд орчихсон үе байлаа. Ц.Даваасүрэн гишүүн Ардын намд тийм ч нөлөө бүхий гишүүн байгаагүй. Тийм ч учраас 2012 онд түүнд тойрог олдохгүй байсан учир намаасаа гарч бие даан нэр дэвшсэн.
