Энэ сарын 19-нд Өмнөговь аймгийн Сэврэй, Номгон сумын нутагт газар хөдөлсөн тухай Одон орон, геофизикийн төвөөс мэдээлсэн. Газар хөдлөлтийн үеэр сумын төвийн айлуудын гэр, байшин доргиж, зарим айлын цонх хагарсан байлаа. Номгоноос зүүн тийш 45 км зайд 4.2 магнитудын хүчтэй хөдөлсөн бол тус сумаас зүүн тийш 28 км-т 5 магнитуд хүчтэй чичирхийлжээ. Иймэрхүү хэмжээний газар хөдлөлт тэр өдөр үндсэндээ дөрвөн удаа давтагдсан байна. Тэгвэл өчигдөр буюу энэ сарын 20-нд Дорноговь аймгийн нутагт мөн газрын чичирхийлэлт болж, цаашлаад манай улсын өмнөд бүс нутгаар 100 удаагийн давтамжтай үргэлжилсэн гэж бүртгэгджээ. Магнитуд буюу баллын хэмжээ харьцангуй бага байсан байна. Ер нь 3.4-өөс доош магнитудын газар хөдлөлтийг багад тооцдог аж. Нийслэл хотын барилгуудын 90 гаруй хувь нь 9 магнитудын хүчтэй газар хөдлөлтөд бараг тэсч үлдэхгүй гэсэн тооцоо бий. Тэгвэл 6-7 магнитудын газар хөдлөлтөд хамгийн түрүүнд нурах барилга 260 гаруй байгаа ажээ.
Б.Баяр
Tumen.mn
