Өчигдөр буюу 2 сарын 26-ны өдрийн 13.00 цагийн орчимд АТГ-ын мөрдөн байцаагч н.Эрдэнэсайхан, н.Ганбаяр нар МАХН-ын дарга Н.Энхбаярт зарлан дуудах хуудас өгч саатуулахаар завдсан. Энэ талаар өнөөдөр МАХН-ын нарийн бичгийн дарга Ц.Шаравдорж, Г.Дугаржав, АШЁМНХ-ны тэргүүн Л.Сэлэнгэ нар мэдээлэл хийлээ.
БНСУ-д биеэ эмчлүүлж байгаа МАХН-ын дарга Н.Энхбаяр сар шинийн баярыг тохиолдуулан өндөр настай эцэг эх, гишүүд дэмжигчидтэйгээ золгохоор ирээд удаагүй байгаа. Түүнийг ирсэн цагаас нь эхлэн АТГ болон хуулийн байгууллагынхан мөрдөн мөшгөж буй талаар Ц.Шаравдорж ярилаа. Тэрбээр “МАХН-ын дарга Н.Энхбаярт зохиомол хэрэг үүсгэн мөрдөн шалгах үйлдэл тасрахгүй байна. Өчигдөр буюу 2 сарын 26-ны өдрийн 13.00 цагийн орчим АТГ-ын ажилтан болох н.Эрдэнэсайхан, н.Ганбаяр нар ирж Н.Энхбаяр даргад зарлан дуудах хуудас өгч гарын үсэг зуруулахаар оролдсон. Бүр дахин дахин орж ирж зарлан дуудах хуудасаа өгөхөөр улайрч байсан. Зарлан дуудах хуудаст 2 сарын 27-ны 15.00 цагт АТГ дээр оч гэсэн байсан. Харамсалтай нь ямар шалтгаанаар ийнхүү зарлан дуудах хуудас өгч байгаа болон АТГ дээр аваачиж чухам яах гэж байгаагаа тайлбарлахаас татгалзсан. Бид ч ямар шалтгаанаар АТГ Н.Энхбаярыг дуудаж байгаа шалтгааныг тодруулж чадахгүй байна. Өчигдөр буюу шинийн наймны билэгт сайн өдөр Н.Энхбаярын ээжийн 80 насны ой тохиосон. Гэтэл Н.Энхбаярыг ийнхүү саатуулж тэр сайхан өдрийн уур амьсгалыг АТГ-ынхан эвдэж, ямар ч шалтгаангүй хууль бус үйлдэл хийж байгаа нь ойлгомжгүй байна. Н.Энхбаяр урьд нь зохиомол хэргээс болж удаан хоригдож, эрүүл мэндээрээ хохирсон. Тиймээс АТГ-ынхан зарлан дуудах хуудас өгөх нэрийдлээр хүнийг яаж хэлмэгдүүлдэгийг сайн мэднэ” гэлээ.
Хуулинд заасны дагуу хууль хяналтын байгууллагынхан хэн нэгэн этгээдэд зарлан дуудах хуудас өгөхдөө ямар шалтгааны улмаас өгч байгаа болон мэдүүлэг авах, байцаалт өгөх алин болохыг заавал тайлбарлах үүрэгтэй байдаг. Гэтэл Н.Энхбаярыг ямар шалтгааны улмаас АТГ-аас дуудаж, зарлан дуудах хуудас өгч байгааг тайлбарлаагүй нь өөрөө хууль зөрчсөн үйлдэл хэмээн МАХН-ынхан үзэж байна. Мөн Н.Энхбаярын өмгөөлөгч орон нутагт ажилтай яваа учир иртэл нь зарлан дуудах хуудсыг авах боломжгүй, зарлан дуудах хуудсанд гарын үсэг зураагүй, хүлээж аваагүй байна. Гэтэл АТГ-ын хоёр ажилтан болох н.Эрдэнэсайхан, н.Ганбаяр нар заавал авахыг шаардаж удаа дараа ажлын байранд нь орж иржээ.
Хууль хяналтын байгууллага хэн нэгний эрх ашгийн төлөө ажиллах ёсгүй. Гэтэл МАХН-ын дарга Н.Энхбаярыг ийнхүү дахин дахин мөрдөн шалгаж, аль болох хэрэгт холбогдуулах гэж хичээж байгаа нь хэн нэгэн эрх мэдэлтний турхиралт хэмээн МАХН-ын удирдлагууд үзэж буй ажээ. Энэ талаар МАХН-ын нарийн бичгийн дарга Ц.Шаравдорж “Болж байгаа үйл явцаас харахад бүх юм ойлгомжтой байна. Ардчиллаар халхавч хийсэн дарангуйлал Монголд бий болчихсон нь харагдаж байна. Монгол Улсын Ерөнхийлөгч байсан хүнийг ингэж хэлмэгдүүлж, хавчин дарамталж байхад энгийн иргэдийг яадаг нь ойлгомжтой. Н.Энхбаяр даргыг эх орондоо ирсэнээс эхлэн хууль хяналтынхан мөрдөн мөшгиж, ямар нэгэн аргаар саатуулахыг хичээж байгаа нь энэ хүнд дахин нэг зохиомол хэрэг тохохыг хичээж байгаа нь тодорхой харагдаж байна. Энэ бүхэн эрх мэдэлтнүүдийн эрх ашгийн төлөө хийгдэж байгаа нь ч ойлгомжтой байна. Шударга үнэнийг ямар ч хамаагүй аргаар нухчин дарахыг л оролддог боллоо. Хэдхэн хоногийн өмнө Ноён уулаа аварч үлдэхээр тэмцэж байсан жирийн шударга иргэдийн өлсгөлөнг хэрхэн хүчээр буулгалаа” гэсэн юм.
Б.Отгонбаяр
Эх сурвалж: Tumen.mn
