Орос, Хятад улсуудын харилцаа одоогийн байдлаар урд хожид байгаагүйгээр бат бөх, харилцан итгэлцэл дээр тулгуурлан хөгжиж байгаа бөгөөд энэ онд гэхэд, хоёр орны хоорондох худалдааны хэмжээ урьдчилсан байдлаар 100 тэрбум ам.долларт хүрэх аж.
Энэ талаар БНХАУ-ын Гадаад хэргийн сайд Ван И мэдэгджээ. Тэрээр тус хоёр орны хамтын хүчин чармайлт гуравдагч орнуудын эсрэг огтхон ч чиглээгүй гэдгийг онцлон дурдсан байна.
“Хоёр талын бараа эргэлтийг 100 тэрбум долларт хүргэх зорилтоо биелүүлэхийн тулд бид хамаг хүчээрээ чармайн, Торгоны замын эдийн засгийн бүс дэх газар нутагт хамтран ажиллах талаар гэрээнд гарын үсэг зурах болно” хэмээн Ван И сайд тэмдэглэжээ.
Мөн Хятад улс энэ онд ОХУ-аас байгалийн хий нийлүүлэх баруун чиглэлийн тухай гэрээнд гарын үсэг зурах, зүүн чиглэлийн байгалийн хий дамжуулах бүтээн байгуулалт эхлүүлэх, өндөр хурдны төмөр замын хүрээнд хамтын ажиллагаагаа үргэлжлүүлэхэд бэлэн байгааг сануулсан байна.
“Бид мөн санхүү-банкны, цөмийн эрчим хүчний, нефть олборлолтын салбар дахь хамтын ажиллагаагаа улам гүнзгийрүүлэн хөгжүүлэх болно” хэмээн Хятадын Гадаад хэргийн сайд нэмэн өгүүлсэн аж.
Д.Билэгт
