Засгийн газраас “Таван Ш” ажиллагааг хэрэгжүүлж эхлээд тун амжилттай явж байна. Зарим талдаа удааширалтай байгаа ч гадна дотно талаас нь харж байхад “Шувуу” ажиллагааны хүрээнд УИХ-ын гишүүн, сайд асан Т.Бадамжунайг баривчилж ирсэн гээд дурдаад байвал чамгүй ажил өрнүүлсэн. Үүний зэрэгцээ “Шүүр” ажиллагаа гэж юу юунаас чухал зүйл хэрэгжээд эхэлжээ. Тус ажиллагааны хүрээнд хууль зөрчин ажиллаж байсан таван яамны төрийн нарийн бичгийн дарга, Шадар сайд Ө.Энхтүвшингээр крандуулж, Стандарт, хэмжилзүйн газрын даргын сэтэр зүүж салбарын ажлаа навс унагасан Б.Билгүүн нарын 12 агентлагийн дарга нарыг “шүүрдэж” чөлөөлсөн. Тэгвэл дээрхи хүрээг өргөтгөн Төрийн албаны хууль зөрчин томилогдон ажиллаж байгаа 6000 гаруй ажилтныг “шүүрдэж” энэ сарын 10-ны дотор чөлөөлсөн байхыг бүх шатны сайд, дарга нарт Засгийн газрын хэрэг эрхлэх газрын дарга Д.Амарбаясгалан үүрэг болгосноо олон нийтэд мэдэгдсэн.
“Шүүр” ажиллагааны гол зорилго нь аалзны тор шиг төрийн албыг хэрсэн сайд дарга нарын ашиг сонирхлын зөрчилтэй авилгын томилгоонуудыг эргэн харж хуульд нийцүүлэх явдал юм. Хамгийн сүүлийн бодит жишээ дурдахад УИХ-ын гишүүн асан Т.Аюурсайханы нөлөөтэй томилгоонууд гэмт бүлэглэл болж, эцэст нь шалгаж эхэлсэн гэдгийг хуулийн байгуулллагаас мэдээлсэн. Түүнээс тэтгэврийн нас дөхсөн, хүрсэн гэх мэт шалтгаанаар жирийн нэгэн эмч, багшийг “шүүрдэх” юм бол “Шүүр” ажиллагаа үр дүнгээ өгөхгүй. Монголын төрийн албаны уураг тархийг сайжруулах нэг арга бол нэг намын харъяаллаар төрийн албанд байршуулж байгааг зогсоож гудамжинд явж байгаа нам бус жирийн мэдлэг чадвартай хүмүүсийг төрийн удирдах болон гүйцэтгэх албанд нээлттэйгээр сонгон шалгаруулж томилдог үүд хаалгыг зоригтой нээж өгөх хэрэгтэй. Манай зарим сайд нар ач холбогдол багатай хурал зөвлөгөөн уулзалтад анхаарч авилга, хүнд суртал гаргагчдад төрийн төмөр нүүрийг гаргаж чадахгүй байгаа нь авилгчдыг давраасан хэрэг болж байна. Тухайлбал, Шадар сайдын багцад хамаарах Үндэсний итгэмжлэлийн төвийн дарга С.Соронзонболдыг шүүхээс авилгын хэргээр гэм буруутайг нь тогтоогоод байхад “Шүүр” ажиллагаанд орохгүй сугарч үлдээж байгаагийн цаана ямар учир байна. Үүний цаана маш том эрх мэдэлтэн байна уу, эсвэл авлига албан тушаалын наймааны нэгэн гол зангилаа байна уу гэх мэт олон салаа таамаг өрнөж байна.
Tumen.mn
