ЦХХХЯ, Монгол шуудан ХК, ОБЕГ-ын төлөөллүүд хаягжилтын асуудлыг What3words-оор шийдсэн талаар мэдээлэл өглөө.
What3words буюу гурван үгт хаягийг СБД-ийн 18р хорооны 2059 өрхөд туршиж хаягжуулжээ. Шуудангийн үйлчилгээ, цагдаа, түргэн, онцгой байдал зэрэг үйлчилгээний үед айл өрхийн хаяг олдохгүй байх, цаг алдах асуудал тулгардаг. Харин хаягийг тодорхойлж буй гурван үгийг хэлснээр What3words аппликейшнээр ороод, тухайн айлыг замчлах боломжтой аж.
What3words нь 3м.кв тутам гурван үгээр хаягжуулдаг бөгөөд тухайн үг цээжлэхэд хялбар, энгийн, давтагдашгүй үгс байх юм.
Иргэн та өөрийн хаяг байршил, байгаа газраа хэлж мэдэхгүй тохиолдолд E-Mongolia аппликэйшны нэмэлт цэс дотор байрлаж буй "Яаралтай түргэн тусламж дуудах" дээр дарснаар өөрийн байршлын гурван үгт хаягаа хялбархан тогтоох боломжтой боллоо.
Хэрэв E-Mongolia аппликэйшныг татаагүй тохиолдолд Мэдээлэл, шуурхай удирдлагын төвөөс иргэн pyу тусгай холбоос мессежээр илгээж, түүн дээр дарснаар тухайн иргэн өөрийн байгаа байршлын 3 үгт хаягийг утаснаасаа харан мэдээлэл хүлээн авагчид хэлснээр таны байршлыг тогтоох боломжтой юм.
Энэ талаар ЦХХХ-ы сайд Н.Учрал "Ертөнцийн зүгээр хаяг заадаг улс дэлхийд үлдсэнгүй. Хаягжилтын хуулийг батлахаар ЦХХХЯ, БХБЯ хамтран ажлын хэсэг байгуулан ажиллаж байгаа. Гэхдээ хаягжилтын хуулийг хүлээвэл цаг алдна.
What3words буюу гурван үгт хаягийг Ekids-д мөн нэвтрүүлсэн. Хүүхэд яаралтай үед What3words дээр дарж гурван үгт хаягаа эцэг эхдээ, эсвэл цагдаагийн байгууллагад мэдээлэх боломжтой.
Ялангуяа гэр хороолол, орон нутаг дахь хаягийг тодорхой болгохгүй бол яаралтай үед үнэхээр хугацаа алддаг.
What3words дэлхийн 60 гаруй орны хэлээр орчуулагдсан байдаг. Айл бүр What3words аппликейшн руу ороод, гарч ирэх гурван үгээр хаягаа тодорхойлно. What3words нь дата шаардахгүй, сүлжээтэй байвал хаягийг шууд харах боломжтой." гэлээ.
