Монголын жүдо бөхийн үндэсний шигшээ багаас одоогоор 13 тамирчин "Рио-2016" зуны 31 дүгээр олимпийн наадамд оролцохоор болоод байгаа билээ. Үүгээрээ тэд дэлхийд дөрөвдүгээрт эрэмблэгдэж байгаа бөгөөд Лондонгийн олимпод есөн тамирчинаа илгээж байснаасаа энэ удаа илүү ахисан нь медалийн тоог ч нэмэгдүүлэх үндэс болж байна.
Одоогоор Япон, Бразил, Францын тамирчид эхний гурван байрыг эзэлж байна. Харин манай улстай ХБНГУ тэнцүү тамирчинтайгаар яваа бол БНСУ, ОХУ, БНХАУ зэрэг гүрнүүд араас ахиж байна.
"Рио-2016" олимпийн наадамд оролцуулахаар зарласан 13 жүдоч энэ амралтын өдрүүдэд болох “Мастерс” тэмцээнд эрхийн болзлоо хадгалж чадвал Риог зорих эрх нь албан ёсоор баталгаажина.
