Хөгжлийн бэрхшээлтэй иргэдийн нийгмийн оролцоог дэмжих төслийн хүрээнд Монгол Улсад DET сургалт буюу хөгжлийн бэрхшээл болон тэгш байдлын талаарх ойлголтыг нийтэд түгээх 30 гаруй сургагч багш бэлтгэгдэн дэлхий нийтийн чиг хандлагыг эх орондоо түгээж сургалт явуулж байна. Тэдний нэг болох “Түгээмэл хөгжил” төрийн бус байгууллага Сонгуулийн ерөнхий хорооны захиалгаар 2021 оны 11 дүгээр сарын 30-ны өдөр “Хөгжлийн бэрхшээл ба Тэгш байдал” сургалтыг тус байгууллагын ажилтан, албан хаагчдад явууллаа.
Энэхүү сургалтаар хөгжлийн бэрхшээлтэй хүмүүст тулгамддаг асуудал, онол, практикийн мэдлэг ойлголт олгохоос гадна үйлчилгээ буюу зорилтот бүлгийн хүмүүсийн онцлог, хэрэгцээ, шаардлагад нийцсэн дэмжлэгийг үзүүлэх дадлага сургуулилтыг хийснээрээ давуу талтай байв.
Дашрамд сонирхуулахад, “Түгээмэл хөгжил” ТББ нь өмнөх сонгуулиудад санал авах байрны хүртээмж, хөгжлийн бэрхшээлтэй сонгогчийн сонгох эрхийг хангах асуудлаар судалгаа тандалт, ажиглалт хийж хөгжлийн бэрхшээлтэй иргэдийн бие дааж, сонгох эрхээ бүрэн дүүрэн эдлэхэд чиглэсэн хүртээмжийн асуудлыг хөндсөөр ирсэн бөгөөд сонгуулийн төв байгууллагын зүгээс иргэний нийгмийн оролцоо, хамтын ажиллагааг ийнхүү эхлүүлээд байна.
