Шударга өрсөлдөөн хэрэглэгчийн төлөө газрын дарга О.Магнай өчигдөр ажлаа өгч байгаагаа мэдэгдсэн. Тэрбээр Ерөнхий сайдад өргөдлөө өгчээ. Тус агентлагийн удирдлагыг Ерөнхий сайд Засгийн газрын хуралдаанд оруулж томилж, чөлөөлдөг. Нэгэнт О.Магнай ажлаас чөлөөлөгдөхийг хүссэн тул хүсэлтийг  хангаж таарна. Түүний хувьд гэнэт  ийм шийдвэр гаргах болсноо өнөөгийн Засгийн газар ямар ч сөрөг хүчингүй болж, ардчиллын үнэт зарчим алдагдахад хүрч байгаатай холбон тайлбарлав. Мөн “Шадар сайд У.Хүрэлсүхтэй хамтарч ажиллах боломжгүй, ёс  суртахуун, үнэт зүйл таарахгүй” гэсэн. Гэхдээ тэр нэлээд олон янзын шахалтанд орсон байх магадлалтай гэж зарим эх сурвалжууд хэлж байна. Шатахуун импотрлогчдыг шүүхэд өгсөн, Циркийг цирк хэвээр нь байлгахыг шаардсан, орон сууцны талбайн зөрүү хэмжээсээр иргэдийг шулдаг барилгын компаниудтай шүүхдэлцсэн, эдгээр хэргийг хэтэрхий  нэг талыг барьж шийдвэр гаргасан гэдэг үндэслэлээр бас хэсэг шүүгчдийг хүртэл олны өмнө цоллоод авсан.  Нэг үгээр хэлбэл О.Магнай гэдэг  хүн  олон нийтийн эрх ашгийн төлөө олигархи бүлэглэлүүдийн эсрэг хүчтэй дуугарч байсан тул “шахаанд” орсон байж болох юм гэх хүн цөөнгүй ажээ.

О.Магнай  “Би төрөө цэвэрлэнэ. Төрд цэвэрлэгээ хэрэгтэй байна. Хуйвалдааны журмаар засаг байгуулж байгаа нь ардчилсан  ёс биш”  хэмээн агентлагийнхаа хаалгыг саваад ийнхүү гарч явлаа. Түүний юу хийж бүтээхийг цаг хугацаа харуулах биз ээ.

Б.Отгонбаяр

Эх сурвалж: Tumen.mn