АНУ-ын зэвсэгт хүчин өчигдөр 8,500 цэргээ байлдааны өндөржүүлсэн бэлэн байдалд шилжүүлжээ.

Өөрөөр хэлбэл тушаал өгсөн тохиолдолд богино хугацаанд Европ тивд үүрэг гүйцэтгэхэд бэлэн болсон байна.

Энэ нь Украин улсад ОХУ-ын зүгээс зэвсэглэн халдаж болзошгүй болсонтой холбоотой арга хэмжээ гэнэ. АНУ-ын цэрэг NATO-гийн хариу цохилтын хүчний нэг хэсэг болох юм байна.

Үүнээс гадна тодорхойгүй тооны цэргийн хүчийг яаралтай тохиолдолд нэмж дайчлахаар төлөвлөж байгааг Пентагоны хэвлэлийн төлөөлөгч Жон Кирби мэдээлжээ.

Хариу цохилтын хүч буюу NRF (Nato Response Force) нь “Яаралтай тохиолдолд хаана ч үүрэг гүйцэтгэх чадвартай хуурай газар, агаар, тэнгисийн цэрэг болон тусгай хүчний анги нэгтгэлүүдээс бүрдсэн өндөр бэлтгэл, өндөр технологитой олон үндэстний цэргийн бие бүрэлдэхүүн байна” гэж NATO-гийн гэрээнд тодорхойлсон байдаг.

Зүүн Европ дахь цэргийн хүчээ зузаатгаж, байлдааны хөлөг онгоц, нисэх онгоцнуудыг тус бүс нутагт нэмж илгээж байгаагаа NATO өчигдөр зарласан юм.

Одоогоор NATO-гийн 4,000 орчим цэрэг Эстони, Литва, Латви, Польш улсуудад байрлаж байгаа. Тэднийг танкууд, агаарын довтолгооноос хамгаалах болон тагнуулын системүүд дэмжиж байна.

Украин улсад халдан довтлох төлөвлөгөөгүй гэдгээ ОХУ-ын эрх баригчид давтан илэрхийлсээр байгаа. Гэхдээ тус улсын цэрэг, зэвсгийн ихээхэн хүч Украины зүүн, умард, өмнөд хилийн орчимд хуримтлагдаад байна.

Хэрвээ Орос улс цэрэг, зэвсгээ гэдрэг татвал сөргөлдөөн богино хугацаанд намжих ч ингэх шинж тэмдэг ажиглагдахгүй байгааг Пентагоны хэвлэлийн төлөөлөгч өчигдөр мэдэгджээ.

“Оросын тал одоогоор сөргөлдөөнийг намжаах ямар ч сонирхолгүй байгаа нь тодорхой харагдаж байна” гэж Жон Кирби хэвлэлийн хурлын үеэр хэлсэн байна.

Эх сурвалж: Reuters