Өмнөд Америкийн Парагвай улсад 10 настай дагавар охиноо хүчирхийлж, жирэмслүүлсэн гэх хэргээр 42 настай хойд эцгийг нь баривчилжээ. Цагдаагийн газраас 15 өдрийн хугацаанд мөрдөн шалгалт хийсний эцэст баривчлах тушаалыг гаргаж, хэрэгтнийг саатуулсан аж. 

Хэрэгтэн Гилберто Бенитезийг  хохирогч охины эх  өөрийг нь “хуурсан” хэмээн буруутгаж байгаа бол  сэжигтэн “Ямар ч нотолгоо байхгүй. Эхнэрээ уул мэт хайрлаж, шүтэж ирсэн. Өөр хүн жирэмслүүлсэн зүйл байхгүй” гэх зэргээр няцааж байгаа гэнэ. 

Шүүхээр  Гилберто  гэм буруутай нь  тогтоовол 15 жилийн ял сонсох юм байна. Харин 10 настай охин хүчирхийлүүлсэн хэргийн тухайд Парагвайн гишүүд үр хөндөлтийг зөвшөөрөх эсэх талаар мэтгэлцэж буй аж. Католик шашинтнууд ихэнхийг эзлэх Парагвайд эхийн биед аюул учруулахаас бусад тохиолдолд үр хөндөлтийг хууль бус гэж үздэг байна. 

Одоогоор охин таван сартай жирэмсэн бөгөөд хүний эрхийн байгууллагууд 34 кг жинтэй бага насны охин ураг тээх нь амь насанд нь аюултай гэдгийг тодотгож байгаа бол Засгийн газар, хууль хяналтын байгууллага, католик сүмийнхэн заавал үр хөндөлт хийлгэх шаардлагагүй гэж мэтгэн томоохон хэмжээний маргаан мэтгэлцээн өрнөх болжээ. 

Охиныг  жирэмсэн болсныг  өнгөрөгч сарын 21-нд мэдсэн аж. Гэдэс нь томорсон байсан тул “хавдар” байж болзошгүй гэж ээж нь сэтгэл зовниж эмнэлэгт үзүүлэх үедээ энэ аймшигт үнэнийг мэджээ. Одоогоор ээжийг нь ч гэсэн цагдаагийн газар саатуулаад байгаа юм байна.

О.Мөнхдуулга