Сонгууль болохоос өмнө хаясан гээсэн бичиг баримт "гэнэт алга болдог” жишиг тогтох гээд байх шиг. Юунд ашигладгийг нь хэлж мэдэх юм алга. Сонгуулиас өмнө алга болж байгааг бодохоор сонгуульд л ашигладаг байлгүй гэж таамаглаад л өнгөрөх жишээтэй.

Тэгсэн орон нутагт тодруулбал Орхон аймагт хаясан гээсэн бичиг баримт бүртгэдэг, төвлөрүүлдэг нэгэн газар байдаг байсан боловч одоо үүд хаалгаа барьжээ. Учир нь тус газарт төвлөрөөд байсан бичиг баримтуудыг хэдэн залуус ирээд л үнэ хаялцуулж байгаад л бөөнөөр нь аваад явсан сурагтай.

Ингээд хийх ажилгүй болсон байгууллага үүдээ барьж, сонгууль дуусахыг хүлээхээр болсон юм шиг байгаа юм. Миний нэг танилын хэлснээр алдсан бичиг баримтаа сураглаад л өнөөх газар яваад орж гэтэл нэг ч бичиг баримт байгаагүй бөгөөд бүгдийг нь аваад явсан гэж хэлжээ.

Мэргэжлийн хяналтынхан, гаалынхан, цагдаа, хуулийн байгууллагынхан хяналт шалгалт хийж гарсан зөрчлийг хураан авч устгалд оруулдаг. Харин бөөнөөрөө алга болсон тэдгээр бичиг баримтуудыг устгалд оруулсан эсэх нь тодорхойгүй. Тэгээд ч устгах бичиг баримтыг үнэ цохиж авна гэж баймааргүй л юм. Тэгэхээр ямар нэгэн зорилгоор ашиглах нь ээ гэж л хардахад хүргэж байна.

Түрүүчийн сонгуулиар саналаа өгөөгүй байхад л "өгчихсөн байна” тэмдэглэгээ гарч ирээд байсан гэж сонгогчид ярьж байлаа. Энэ жил ч тийм асуудал гарахыг үгүйсгэхгүй. Өөрөөр хэлбэл эзэн биегүй иргэний үнэмлэхүүд л сонгуульд оролцож санал өгөөд яваад байх нь байна шүү дээ. За тэгээд манайхан адгийн зарга арав хоног гэж төвөгшөөгөөд асуудлыг тэгэсхийгээд хаячихдаг улс хойно. Худалдаж авсан бичиг баримтууд саналын хуудас болоод тоологдоод явахыг хэн үгүйсгэх вэ дээ.

Харин ийм ажлыг төрийн байгууллагад нэлээд том танил талтай хүн л хийх боломжтой. Өөрөөр хэлбэл АН, МАН-ынхан л ийм ажил хийх эрх мэдэлтэй. Түүнээс Арго, Жавхлан, Нара нарт хаясан гээсэн бичиг баримт хэрэг болохгүй нь лавтай.

Шар хүү