АНУ-ын Орегон мужид байрлах “Umpqua Community” коллежид 26 настай Крис Харпер Мерсер халдлага үйлдэж, 13 хүний аминд хүрчээ. Амиа алдагсдын 10 нь тус коллежийн оюутан хэмээн мужийн захирагч Крис Харпер сэтгүүлчдэд мэдэгдсэн байна. Цагдаагийнхан халдагчийг устгасан бөгөөд аюулгүйн байдлын үүднээс коллежийн оюутнууд, багш, ажилчдыг шалгаж эхэлжээ.

Орегон мужийн төвд халдлагад өртөж амиа алдагсдын ар гэрийнхэн болон найз нөхөд, коллежийн оюутнууд цугларч, амиа алдсан 13 хүнийг дурсч, хүндэтгэл үзүүлсэн тухай “www.dailymail.co.uk” мэдээллээ. Төв талбайд 10 мянга гаруй хүн цугларсан байна. Тэд ерөнхийлөгч Барак Обамаг галт зэвсгийн хяналтад анхаарлаа хандуулахыг уриалжээ.

Халдлагын үеэр хөлөндөө буудуулсан 19 настай Ханна Милас гэгч “CNN” агентлагт “Гэмт этгээд халдлага үйлдэхдээ яг л галзуу хүн шиг орилж, тааралдсан газар руугаа буудаж байсан. Миний найз намайг авраад амиа алдсан” гэсэн бол амиа алдсан 17 настай Анастинагийн аав “Ройтерс” агентлагт “Обама эртхэн хууль батлаад, галт зэвсэг ашиглахыг хориглосон байсан бол миний охин амиа алдахгүй байсан” гэсэн байна.

Халдлагын дараа Обама “Дэндүү харамсалтай зүйл боллоо” гэж жиргэжээ.

Б.Дэлгэрцэцэг