ХЗДХ-ийн сайд Х.Нямбаатар, ЦЕГ-ын дарга Ж.Болд нарт Монголын Сэтгүүлдчийн Нэгдсэн Эвлэлээс шаардлага хүргүүлсэн талаар бид өчигдөр мэдээлсэн

Тодруулбал, ажил үүргээ гүйцэтгэж яваа сэтгүүлч, хэвлэл мэдээллийн ажилтнуудыг зарим обьект руу нэвтрүүлэхгүй байх, мэргэжлийн эрхийг нь хууль бусаар хязгаарлан улмаар биед нь халдан хүч хэрэглэсэн явдал өнөөдөр дахин давтагдлаа. МСНЭ нь сэтгүүлч, хэвлэл мэдээллийн ажилтны мэргэжлийн эрх ашгийг хамгаалах үүрэгтэй байгууллагын хувьд гишүүдийнхээ хууль ёсны эрх, хэвлэлийн эрх, эрх чөлөөний талд тууштай зогсохоо мэдэгдэн хүчний байгууллагаас дээрх үйлдлээ дахин давтахгүй байхыг анхааруулж, шаардаж байна

Үнэхээр энэ бол сэтгүүлчдийн эрхээс гадна олон нийтийн мэдэх эрхэд халдаж буй үйл явц. Учир нь хэвлэлийнхэн цар тахлын болон бусад гамшиг, осол болон бусад үед ч нийтийн мэдэх эрхийг хангахын тулд ажилласаар байдаг. Харин нөгөө талд тангараг өргөсөн, үүрэг хүлээсэн цагдаа нартай байнга шахам учирч хэн, хэн нь үүргээ биелүүлж буй тул харилцан ойлголцож ажилласаар ирсэн.

Харин өчигдрийн үйл явцын үеэр ЦАГДАА НАРТ ХЭН ҮҮРЭГ ӨГСӨН БЭ гэдэг асуулт гарч ирж байна. Тухайн маргаанд холбогдсон цагдаа нар дээрээс үүрэг өгсөн гэдэг үгээр халхавчилж, хэвлэлийнхнийг хөөж байгааг нь хэнбугай ч харсан.

Төв талбайд зөвхөн он гарснаас хойш л гэхэд олон удаагийн жагсаал, цуглаан, өлсгөлөн зохион байгуулагдаж байсан. Тэдгээрийг сурвалжлах, мэдээллэх эрх ч нээлттэй байсан. Түүнчлэн эрх баригчид өөрсдөд нь хэрэгтэй хүмүүсийнхээ өлсөж цангах асуудлыг бүгдийг нь шийдэж цагдаа нарт аядуу зөөлөн байх чиглэлийг өгч сэтгүүлчдийг чөлөөтэй нэвтрүүлж байсан цаг саяхан. Гэтэл энэ удаа хэн гэдэг, ямар албан тушаалтай том дарга цагдаа нарыг дээрээс нь удирдаж, олон нийтийн мэдэх эрхийг хааж, хэвлэлийг хорьж, сэтгүүлчийн биед халдсан бэ.

Ард нийтийн амгалан тайван байдлыг сахиулах үүрэгтэй цагдаагийн алба хаагчид арай улстөрчдийн дохио зангаагаар урдах ажлаа хийдэг болчихсон юм биш биз дээ. Эрхэм дарга, хурандаа Ж.Болд та үүргээ гүйцэтгэж буй цагдаа нараас илүү үүрэг өгдөг том ДЭЭДСЭЭ ил болгож, хариуцлага тооцон, хэвлэлийнхэнтэй хамтран ажиллахыг бүтэн салбарыхан шаардаж байгааг мөн дуулгая

Эх сурвалж: Erennews.mn