Ерөнхийлөгч Ц.Элбэгдорж түймрийн гал бүрэн унтраагүй байгаа зүүн гурван аймагт ажиллаж байна. Тэрбээр өчигдөр Дорнод аймгийн түймэртэй сумд, аймгийн төвд ажиллан өнөө өглөө Сүхбаатар аймгийг зорив. ОХУ-аас энэ сарын 20-ны үед орж ирсэн түймэр Дорнод аймгийн Дашбалбар, Баян-Уул, Цагаан-Овоо сумын нутагт ассаар байгаа аж. Эдгээр сумын 110 гаруй мянган га талбай түймэрт шатсан байна. Мөнгөн дүнгээр энэ нь 430 орчим сая төгрөгийн хохирол бөгөөд 14 айлын хашаа, нэг айлын зуны байшин, 453 толгой мал түймэрт шатжээ. Энд нийслэлийн болон аймгийн гал сөнөөгчид ажиллаж байна. Тэдний гол зэвсэг нь бензинээр ажилладаг үлээгч аппарат юм. Гэвч энэ нь шатахуунаар дутагдаж, гал сөнөөгчид орон нутгийн шатахуун түгээх станцуудаас зээлээр авч байгаа гэнэ. Ерөнхийлөгч энэ бүхэнтэй танилцаад Сүхбаатарт очжээ. Түймэр болон бусад хүндрэлтэй асуудлыг шийдэхэд тэр Засгийн газарт тодорхой чиглэл, арга зам болохуйц зүйлсийг энэхүү аялалынхаа явцад хэлж өгч яваа ажээ.
Баяр
Эх сурвалж: Tumen.mn
