“Монголын мэдээ” сонин дэлхий дахин манай улсыг аль талаас нь сонирхож, хэрхэн мэдээлж буйг онцлон орчуулан уншигчиддаа хүргэдэг уламжлалтай. Энэ удаа Монголын эдийн засаг, Эгийн голын Усан дахилгаан станц хийгээд Швейцарийн нисэх онгоцны буудалд борц авч очсон монгол эмэгтэйн талаарх мэдээлэл дэлхийн хэвлэлд хэрхэн бичсэнийг тоймлон хүргэж байна. Монгол Улсын хувьд өнөө жил АСЕМ- ийн дээд хэмжээний уулзалт зохион байгуулах учраас энэ талаар дэлхийн хэвлэл мэдээлэл илүүтэй анхаарал хандуулж буй. Мөн Эгийн голын усан цахилгаан станц барих тухай асуудал болон Оюутолгойн далд уурхайн бүтээн байгуулалт өнөө хэр моодноос гараагүй сэдэв хэвээр байгаа юм.
Казахстан, Монголын эдийн засгийн өрсөлдөх чадварын рейтинг буурлаа
“ca-news.org” сайтнаа дэлхийн улс гүрний эдийн засгийн өрсөлдөх чадварыг харуулсан сонирхолтой мэдээлэл нийтэлжээ. Гэхдээ мэдээлэлдээ Казахстан, Монголыг онцолсон байх аж.
Уг мэдээллийг хөрвүүлбэл, Швейцарийн менежмэнтийн хөгжлийн хүрээлэн дэлхийн эдийн засгийн өрсөлдөх чадварын рейтингийг гаргалаа. Үүнээс үзэхэд, Казахстан, Монгол хоёр улсын эдийн засгийн өрсөлдөх чадвар өмнөөсөө буурсан үзүүлэлттэй байна. Тодруулж хэлбэл, өрсөлдөх чадварын рейтингээрээ өнгөрсөн жил 34-т жагсч байсан Казахстан 14 байраар ухарч, 47-д бичигдсэн нь эдийн засгийн маш том уналтыг харуулж байгаа юм. Харин Монгол Улсын хувьд гурван байраар ухарч, 57-оос 60-рт бичигдэж байна.
Энэ удаагийн өрсөлдөх чадварын зэрэглэлийг гаргахдаа ДНБ өөр өөр төвшний дэлхийн 61 улсыг хамруулж, нийт 5400 судалгаанд үндэслэн гаргажээ. Харин уг үзүүлэлтийг Хонконг тэргүүлж, Швейцарь удаалсан бол гурван жилийн турш тэргүүлж байсан АНУ манлайлагчийн байр сууриа алдаж, гуравдугаарт эрэмбэлэгдлээ. Эдийн засгийн өрсөлдөх чадвараараа тэргүүлэх топ-10 улсад Сингапур, Швед, Дани, Ирланд, Нидерланд, Норвеги, Канад багтаж байгаа юм. ОХУ-ын хувьд өрсөлдөх чадвар сайжирч, 45-аас 44 болж дэвшсэн бол Венесуэл урьдын адил сүүл мушгилаа...” гэжээ.
Жон Керри уламжлалт фестивальд оролцоно
АНУ-ын төрийн департментын албан ёсны вэб хуудаснаа Төрийн нарийн бичгийн дарга Жон Керри Монголд айлчлах тухай мэдээлэл нийтлэгдсэн байв.
Үүнд “...АНУ-ын Төрийн нарийн бичгийн дарга Жон Керри зургадугаар сарын 2-8-ны өдрүүдэд Францын Парис, Монголын нийслэл Улаанбаатар, Хятадын Бээжин хотноо ажлын айлчлал хийнэ.
Тодруулбал, тэрбээр энэ сарын 2-4-ний хооронд Парис хотноо айлчилж, Ойрхи Дорнодод энх тайвныг тогтоох асуудлаар тус улсын албаныхантай хэлэлцэхээс гадна Гадаад хэргийн сайд Жан Марк Аяролттай уулзаж, Сири, Иракт “Лалын улс” бүлэглэлийн эсрэг тэмцэж буй цэргийн эвслийн үйл ажиллагаанаа талаар ярилцана. Үүний дараа Монголын нийслэл Улаанбаатар хотноо айлчилж, Засгийн газрын холбогдох албаныхантай уулзана. Тус хотод тэрбээр Монголын үндэсний уламжлалт соёлын фестивальд оролцож, хотын залуу удирдагчидтай уулзахаар төлөвлөсөн...” гэжээ. Дэлхийн нөлөө бүхий удирдагчдын нэг болох түүний энэ удаагийн айлчлалыг дэлхий нийтийн анхаарлыг татаж байна.
Сарлагийн мах Шинэ Зеландын эдийн засагт 16 сая ам.долларын хохирол учруулах уу
“4-traders.com” гэх сайтнаа Монгол эмэгтэй Шинэ Зеланд руу үхрийн мах, бяслаг авч очиж, нисэх онгоцны буудлын шалган нэвтрүүлэх хэсэгт нэлээд асуудал үүсгэсэн тухай мэдээллийг нийтэлжээ.
Өнгөрсөн долоо хоногт Аукландын нисэх онгоцны буудалд газардсан нэгэн эмэгтэйн тээшнээс Шинэ Зеландчуудын өмнө нь үзэж харж байгаагүй өвөрмөц хүнсний бүтээгдэхүүн гарч ирсэн гэнэ. Түүнчлэн эмэгтэй огт англи хэлээр ярьж чадахгүй байсан нь нисэх буудлынханд эргэлзээ төрүүлсэн байх юм. Тэгвэл тус эмэгтэйн охины хэлж буйгаар тээшинд нь сарлагийн борц, бяслаг байжээ. Аукландын нисэх онгоцны буудлын менежер Дэйв Симс “Тэр эмэгтэй хаа байсан Монголоос авчирсан байсан. Гэхдээ шинэ Зеланд руу нэвтрүүлэх боломжгүй” гэж ярьжээ.
Тэдний хувьд уг хүнс нь Шинэ Зеландын эдийн засагт ноцтой хохирол учруулж болох олон төрлийн малын халдварт өвчний нян тээж байж болзошгүй гэж үзсэн байна. Мөн нисэх буудлын менежер “Монголын мал сүрэг олон төрлийн малын гаралтай өвчнөөр өвчилж байгаа. Энэ аюул Шинэ Зеландад нүүрлэхийг бид хүсэхгүй байна. Шинэ Зеландын эдийн засагт 16 сая ам.долларын хохирол учруулж болзошгүй” гэж хэлсэн тухай тус сайтнаа бичжээ.
АЦС барихад нь Оросын тал туслахад бэлэн
ОХУ-ын “Tass” агентлагийн цахим хуудаснаа дээрх мэдээлэл тавигджээ. Үүнд “...Шүрэнгийн УЦС-ыг барихын оронд ДЦС болон АЦС барихад нь Монголд туслахад Оросын тал бэлэн байна. Энэ тухай Эрхүү мужийн захирагч Сергей Левченко Орос-Монголын Засгийн газар хоорондын комиссын шийдвэрийг иш татан мэдэгдлээ.“Бид энэ асуудлыг Байгалийн нөөц, экологийн сайд бөгөөд тус комиссыг даргалагч Сергей Донскойтой ярилцсан. Монголд байдаг сайн чанарын нүүрсээр ажиллах хэд хэдэн дулааны цахилгаан станц /ДЦС/ эсвэл атомын цахилгаан станц /АЦС/ барихыг Монголын талд санал болгоё гэсэн бидний санаачилгыг сайд дэмжлээ” гэж С.Левченко ярьсан юм. Сайд С.Донской өмнө нь мэдэгдэхдээ “Дэлхийн хамтын нийгэмлэгийн зүгээс Сэлэнгэ мөрөн дээр УЦС барих асуудалд сөргөөр хандаж байгаа, мөн Орос улс үүнийг эсэргүүцэж байгаа учраас энэ төслийн экологийн үнэлгээ хийгдэхгүй, УЦС баригдахгүй” гэж байв. Түүний хэлснээр, Монголд эрчим хүчний хэрэгцээ
шаардлага бий гэдгийг ОХУ ойлгож байгаа бөгөөд өөр бусад хувилбарыг санал болгоход бэлэн байгаа аж.
Харин Эрхүү мужийн захирагчийн үзэж байгаагаар, Сэлэнгэ мөрөн дээр УЦС барих гэсэн Монголын байр суурь нь Оросын талыг эрчим хүчний тарифаа буулгахад хүргэх зорилготой мэт харагдаж байгаа ажээ. Тэрбээр хэлэхдээ “Экологийн шаардлагаас үүдэн Шүрэнгийн УЦС-ыг барих магадлал бага. УЦС-аас эрчим хүч гарган авахын тулд Монголын нутгийн талыг нь усанд живүүлэхэд хүрнэ” гэсэн байна. Монголын тал Байгаль нуурт цутгадаг Сэлэнгэ мөрөн болон түүнд цутгадаг голууд дээр хэд хэдэн УЦС барихаар төлөвлөж байгаа юм. Сэлэнгэ мөрөн нь Байгаль нуурын усны 80 хувийг хангадаг билээ...” гэжээ. Сэлэнгэ мөрөн болон түүнд цутгадаг голууд дээр манай улс хэд хэдэн усан цахилгаан станц барихаар төлөвлөсөн. Гэвч ОХУ-ын зарим экологичид уг асуудлыг эсэргүүцэж буй юм. Тэдний хувьд усан цахилгаан станцуудыг барьснаар Байгаль нуур ширгэхэд хүрнэ хэмээн эмээж буй.
Монголын мэдээ
Б.Даваа
