Шаналах зүйлгүй амьдарна гэдэг хүнд заяах эд биш байх. Гагцхүү шаналах сэтгэлгүй тэнэгдүү байж гэмээнэ сая энэ ховор завшааныг эдэлнэ. Төрийн сайдаас эхлээд тэрлэг нь нөхөөстэй гуйлагчин хүртэл энэ зовлон үргэлжилнэ. Ерөнхийлөгчөөс эхлээд ердийн иргэн хүртэлх энэ шаналан дуусч дундардаггүй болохоор л хүний орчлонгийн утга учир оршиж байгаа хэрэг.

     Тиймээс ч энэ амьдралын хаа нэгтээ шаналдаггүй ганц хүн олж харах нь сонин үзэгдэл. Тэр тусмаа сүүлийн жилүүдэд шаналан нэмэгдсэнүү гэхээс огт хасагдсангүй. Эдийн засгийн хямрал, төр засгийн байж байгаа байдал нь иргэдийг тэр чигээр нь шаналгаагаар дарчихсан. Өдгөөгөөс хорь гаруй жилийн өмнө бол хаа нэг шаналгаагүй хүн олж хардаг байсан байж таарна. Сүүлийн 25 жилд бол энэ тухай дурдалтгүй.

      Харин энэ өдрийн одноос ч ховор зүйлийг саяхнаас олж харах болов. Радио телевиз, сонин хэвлэлээр гэнэт үзэгдэх болсон Л.Гүндалайг хараад манай нийгэмд нэг ч атугай шаналгаагүй хүн байгаа юм байна даа гэж бяцхан тайвшрах болов. Германд оюутан байхаасаа эхлээд бизнес үргэлжлүүлж, өдгөө хэнээс ч гуйхгүй хөрөнгөтэй болчихсон нөхөр бол Л.Гүндалай. Гэхдээ тэр бусад шиг хахаж цацсан баян бол биш байх. Ямартай ч хоёр идэхгүй хоосон хонохгүй хүн. Түүнээс бус “АПУ” Г.Батхүү, “женко” Х.Баттулга, “ажнай” Д.Бат-Эрдэнэ энэ тэрийн дэргэд бол таргийн таван ямаатай л хүн.

         Гэсэн хэдий ч тэрээр энэ байгаа байдалдаа сэтгэл хангалуун, ямар ч шаналгаагүй явж чадаж байна. Нөгөө талаар УИХ-д хоёр ч удаа суусан нөхөр Хөвсгөл аймагтаа ахин нэр дэвшээд өвдөг шороодсон. Тэглээ гээд гуниж шаналсангүй. Уг нь тэр ялах боломж байсан ч өлссөн түмэндээ өөх ярьсаар байгаад өөрийгөө дэгээдчихсэн. Нам нь ялж, засгийн эрх барилаа. Үүний дагуу гудамжинд байсан олон нөхдийг албанд залгуулсан. Харин мань эрд бялуунаас юу ч оногдсонгүй. Гэлээ гээд шаналсангүй. Харин ч эсрэгээрээ намаасаа албан ёсоор татгалзаж, шинээр нам байгуулаад ажилдаа шуударлаа.  Хэвлэл мэдээллээр баахан хүн загналаа. Ямар ч шаналгаа харагдахгүй байна, түүнээс.  

        Урьд өмнө ч гэсэн намаасаа гарч, Ард түмний нам гээчийг байгуулан ажиллаж байсан. Гэтэл золигийн муу Ц.Нямдорж онгоцны буудал дээрээс түүнийг баривчлуулж, улмаар түүнд нөмөр нөөлөг хэрэгтэй байсан учраас АН-аа бараадсан. Энэ үед ч тэр шаналангүй байсан гэхэд болно. Түүнд өнөөдөр бүр ч шаналан алга. Төрийн түшээгээр удаа дараа сонгогдож байсан хүнийг шаналах сэтгэлгүй тэнэг гэхэд арай л өрөөсгөл мэт. Гэхдээ л төр түшилцэж байсан хүний шаналгаа бусдаас илүү байх учиртай даа гэсэн бодол хэнд ч төрж таарна.

        Ерөөсөө л маш сонин дүр бол Л.Гүндалай мөн. “Ард түмнээ хайрлая” гэх нэртэй нам байгуулж байгаа тухай ярихдаа тэр “Айсуй 2016 онд Эрдэнэтээс нэрээ дэвшүүлнэ. Эрдэнэт бол төвлөрсөн суурин газар, хотод ойр сурталчилгаа хийгээд явсан ч амар. Хөвсгөл бол уудам нутагтай, уул хадаар тархан суурьшсан учраас хүнд. Тэгэхээр тал талын хэмнэлт хийх үүднээс Эрдэнэтэд нэрээ дэвшүүлэх гэсэн юм” хэмээсэн.

      Эндээс харвал удаа дараа төр түшилцсэн хүний үг лав биш. Нөгөө талаар нэлээд эрүүл бус сэтгэлгээтэй хүн бол яах аргагүй Л.Гүндалай гэж хэлэхэд хүргэнэ. Шуудхан хэлэхэд ийн хэлж суугаа хүнд бол ямар шаналан байхав дээ гэж бодохоор. Тэгээд энэ эрүүл бус сэтгэлгээтэй хүнийг хоёр ч удаа сонгосныг бодохоор бас л хэцүү. Ямар хөвсгөлчүүд бүгд л ийм шаналангүй амьтад байв гэж дээ. Ямартай ч Л.Гүндалай шиг амьдрахсан гэх хүмүүсийн тоо олширч байна.

А.Гал