Баян-Өлгий аймагт хээрийн сургууль хийж байсан Зэвсэгт хүчний ангийн бие бүрэлдэхүүн ОХУ-ын хилийг санаандгүй зөрчиж, тус улсад шалгагдаж байгаа гэх мэдээлэл өчигдөрийн цахим ертөнцийн онцлох байлаа. Тэгвэл энэ талаар Хил Хамгаалах Ерөнхий газрын Олон нийттэй харилцах албаны дарга дэд хурандаа Д.Энхтайванаас тодрууллаа.
- Зэвсэгт хүчний албан хаагчид хээрийн сургуулилтын үеэр ОХУ-ын хил зөрчиж шалгагдаж байгаа гэх. Энэ сургуулилт хэзээ болсон юм бэ?
- Баян-Өлгий аймагт тавдугаар сарын 12-нд хил давсан хэрэг гарсан. Арван найман иргэн хил давсан нь үнэн. Одоогийн байдлаар тагнуулын шугамаар шалгаж байна.
- Тагнуулын шугамаар гэхээр ОХУ-аас уу, эсвэл дотоодын тагнуулаас шалгаж байгаа хэрэг үү?
- Манайд шалгагдаж байгаа. Одоогийн байдлаар шалгах шатандаа явж байгаа учир нарийн мэдээлэл өгөх боломжгүй байна. Ямартай ч Баян-Өлгийд сургалт зохион байгуулчихаад Алтай Таван Богдод газар үзэх гэж явсан Зэвсэгт хүчний 18 хүн замдаа төөрснөөс энэ хэрэг гарсан.
- Ярилцсанд баярлалаа.
Б.Хишигдэлгэр
