БНХАУ ирэх хоёрдугаар сард болох өвлийн олимп хүртэл хил гаалийн түвшинд хатуу бодлого баримталж байгааг Гадаад харилцааны сайд Б.Батцэцэг мэдэгдэв. Тэрбээр хэвлэлд өгсөн тайлбардаа “Ирэх оны хавраас нааш урд хөрш рүү зорчих боломж нөхцөл байхгүй байна. Хятадтай Монгол Улс ямар нэгэн байдлаар улс төрийн харилцаа болоод гадаад харилцааны хувьд маргаан байхгүй. Хөрш орнуудын ерөнхийлөгч, ерөнхий сайдууд утсаар ярьсан. Коронавирусийн халдвартай холбоотой урд хөршийн баримталж байгаа бодлого бол зөвхөн Монгол Улсын хувьд биш хуурай замын боомттой найман улсад ижил байна. Хятадын боомтын зөвлөл халдварын нэг ч тохиолдлыг гадаадаас нэвтрүүлэхгүй гэдэг зарчмыг нэвтрүүлээд явж байгаа. 2022 оны хоёрдугаар сард олимп болох гэж байгаа. Дэлхийн аль ч улс орны ерөнхийлөгч Бээжинд айлчлалаар очихгүй байгаа гэдгийг иргэд харгалзаж, хүлээцтэй байх хэрэгтэй" гэжээ
