Буриадын нийслэл Улаан-Үд хотын стриптиз баарын зөөгчид нүцгэн шахуу үйлчилгээ үзүүлдэг талаар өмнө нь манай сайт бичиж байсан. Харин одоо энэ моод эндхийн зоогийн газарт "халдварлажээ".
Шинээр нээгдэж байгаа "Банкет Холл" зоогийн газар өөрийгөө сурталчлах шаардлага ч гарсангүй. Ам дамжсан яриа, нэгэн телевизийн "гүйдэг зар" л хангалттай байж, Улаан-Үдийн оршин суугчид энэ ресторанд шавах болжээ.
"Бүсгүйчүүд, залуусыг эротик хувцастай ажиллах өндөр цалинтай ажилд урьж байна" гэж гүйдэг заранд бичжээ. Зарим иргэн Оросын Дотоод хэргийн яаманд хандаж тайлбар хүссэн ч "Ийм ер бусын үйлчилгээнд гэмт хэргийн шинж алга" гэж хариулсан байна.
Зоогийн газрын захирал Жамс Очиров "Маш олон хүн ажилд орохоор ирсэн тул шалгаруулалт явуулсан. Гадаад өнгө үзэмжээс гадна ичиж зовохгүй байх, хүмүүстэй харьцах чадвар зэргийг харгалзан үзсэн юм. Аргагүй шүү дээ, тэд надаас ч өндөр цалин авдаг" гэж ярилаа.
Нийт 6 бүсгүй, 6 эрийг сонгосон бөгөөд ээлж бүрд гурав гурваараа ажиллаж байгаа аж. Эротик зөөгчид өндөр цалин авдаг төдийгүй үйлчлүүлэгчид нь тэдний гарыг өгөөмөр цайлгадаг гэнэ.
Зөөгч эрчүүд ярилцлага өгөхөөс татгалзсан бол бүсгүйчүүд дуртайяа ам нээж байлаа. Нэг зөөгч бүсгүй "Би оюутан. Хичээлийн дараа ажилладаг. Ингэж л сургалтандаа нэмэрлэдэг. Ар гэрийнхэн маань энд ажилладагийг мэдэхгүй" гэж ярив.
Үйлчлүүлэгч Владимир "Сонирхолтой, шинэлэг үйлчилгээ байна. Энэ ресторан их алдарших байх. Бүсгүйчүүд нь их царайлаг, аятайхан учраас цайны мөнгө ахиу өгмөөр санагддаг" гэжээ. "Ер бусын, сонирхолтой байлаа. Их таалагдсан" гэж Борис гэдэг эр өгүүлэв.
Харин үйлчлүүлэгч Татьяна "Энэ бол эмэгтэйчүүдийг доромжилж байгаа хэрэг. Эндхийн үйлчлүүлэгчид ичиж зовон биеэ эв хавгүй авч явж байна. Нэг нь бүр нүцгэн хөхөө далдлах гэж хоолны цэс, үс, гараараа оролдох юм. Ёстой тэдний өмнөөс ичиж зовмоор" гэж ярилаа.
Сонирхолтой нь, үйлчлүүлэгчдийн дунд эрчүүд биш харин эмэгтэйчүүд олон байлаа.
www.mnews.mn
