Нийслэлийн Засаг даргын Тамгын газар, нийслэлийн Шинжлэх ухаан, үйлдвэрлэл, инновацын газраас хэрэгжүүлж буй мэдээлэл, технологийн салбарын ажлын байрыг нэмэгдүүлэх, өндөр ур чадвар бүхий хүний нөөцийг бэлтгэх, багшлах боловсон хүчнийг чадавхжуулах, программ хангамжийн сургалтын хөтөлбөрийг сайжруулах, дэлхийд өрсөлдөх чадвартай “10.000 программист” бэлтгэх төслийг энэ оны 5 сараас эхлэн хэрэгжүүлээд явж байгаа билээ.
Нийслэлийн Засаг даргын Тамгын газар, Нийслэлийн Шинжлэх ухаан, үйлдвэрлэл, инновацын газраас хэрэгжүүлсэн анхан болон ахисан шатны сургалтад хамрагдсан 500 хүнээс бусдыгаа манлайлсан, цаашид үргэлжлүүлэн суралцах чин хүсэлтэй боловч төлбөрийн боломж хомс 10 эрэгтэй, 10 эмэгтэй хүүхдийг сонгон шалгаруулж АНУ-ын Азийн сангийн тэтгэлгээр бага орлоготой өрхийн охид эмэгтэйчүүдийг дэмжих зорилгын хүрээнд нийт 20 суралцагчдыг 6 сарын хөтөлбөрт үнэгүй суралцуулахаар болов. Мөн Гэрэгэ Системс ХХК нь нийгмийн хариуцлагын хүрээнд хөгжлийн бэрхшээлтэй, асрамжийн газрын 3 хүүхдийг нэмж үнэ төлбөргүй академийн хөтөлбөрт хамруулж байна.
