Төр, тэр тусмаа МАН-ын булхайг ухаад байвал энэ Засгийн газар байтугай Л.Оюун-Эрдэнийн нас ч хүрэхгүй. Ерөнхий сайд маань үүнийг сайн мэдэж байгаа учраас системтэйгээр булхайг илчилсэн болж дуулиан тарьж байна. Хөгжлийн банк гээд дуулиан шуугиан болоод байсан, ямар зальдагч, зээлдэгч нь ял авсан юм. Тэндээс төлөгдсөн гэх нэг их наяд төгрөг яасан юм. Үнэхээр тийм хэмжээний мөнгө орж ирсэн юм бол ард иргэдийн амьдралын хаана бодит тусгалаа өгсөн юм. Өдрөөс өдөрт ядуурч модоо барьж байна. Тэгснээ далд эдийн засгийг ил болгосноор нэг их наяд гаруй төгрөг орууллаа хэмээн сэвүүлэх аж. Хаана байна вэ. Ядахад өнөөх лоозон болгосон ч урагшаа ганц ч алхдаггүй “Шинэ сэргэлтийн бодлого”-руугаа хийсэн юм уу. Ганц тоосго ч тавиагүй. Хаа сайгүй тууз хайчилж, шав тавьж байгаагаас өөр юу байна вэ, нэрлээч. Юу ч байхгүй. Зүгээр л сонгуулиар дахин өндөр дээд суудалд үлдэх гэсэн пиар ажиллагаа. Ерөнхий сайдынхаа гоё ганган үг, том том тоо сонсоод өлсөж байгаа ард түмний амьдрал өдрөөс өдөрт уруудаж байна. Ирэх сонгуулийн өмнө нэг “амь тариа” хийж аваад ялалт байгуулан гэсэн төлөвлөгөө байгааг юу юунаас харж болно.
Нүүрсний хулгайч хэмээн зарлаад сүр дуулиан болоод байсан юу болов. МАН дотор өөрийнх нь үгийг дагаагүй, нэг их хэрэг болохооргүй хэдэн нөхдийн нэр зарлачихаад шуугиан тарьж байна. Т.Аюурсайхан, Ж.Мөнхбат нар идэж уусан байж болно. Гэвч тэд маргаашийн МАН-ын дарга, Ерөнхий сайдын эрэмбэтэй л залуучууд учраас ийнхүү шахалтаар бүрэн эрхээ түдгэлзүүлчихсэн. Сонгууль дуусна, маргааш нь хэрэг хэрэгсэхгүй болно. Эсвэл торгуулийн замаар ял аваад улс төрийнхөө карьерт цэг хатгуулна. Өөр юу ч байхгүй. Нүүрсний гэх хэргийн хөлд хэдэн гүйцэтгэгч албан тушаалтнууд л хохирч байна. Үнэхээр нүүрс хулгайлж байсан бол тухайн үеийн Ерөнхийлөгч, Ерөнхий сайд болон бусад эрх мэдэлтнүүд яагаад мэдээгүй байх гэж. Эсвэл хамт хулгай хийж байсан хэрэг үү. Үүнийг ганцхан Л.Оюун-Эрдэнэ олж мэдээд сэвээд байгаа хэрэг биш. Зүгээр л сонгууль угтсан шоу. Үүний хөлд цөөн тооны хүмүүс хохирч үлдээд хэрэг намдана. Өөр ямар ч аргагүй болчихоод ийм технологи хэрэглэж байгаа хэрэг шүү дээ.
Сүүлийн үед Боловсролын зээлийн сан гэх зүйл гаргаж сэвлээ. Энэ зээлийн сангаас өөрийг нь өсгөж бойжуулсан ах эгч нар, өөрсдөө зээл авснаас иргэн Болд аваагүй. Тэгэхээр үүнийг тэгэсхийгээд орхино. Бас л нэг сонгууль угтсан пиар ажиллагаа. Одоо түүнд сонгууль хүртэл ухахад хангалттай олон сан бий. Энэ сангаас жирийн бизнесмэн Бат зээл авдаггүй. Аанай л өөрсдийнх нь ах эгч нар, тэдний хамаарал бүхий этгээдүүд авдаг. Энэ хэрээр томчуудын булхайг илчилсэн нэрээр өндөр авах гэсэн Л.Оюун-Эрдэнийн санаа. Тэгэхээр Ерөнхий сайдын “амь тариа” дуусахгүй. Л.Оюун-Эрдэнийн “амь тариа” дуусахгүй, дуусгах ч үгүй. Гагцхүү ард түмэн өрнөж байгаа пиар технологи, тэдний зальт аргыг мэдсэн цагт энэ “амь тариа” дуусна.
ҮРГЭЛЖЛЭЛ БИЙ ...
TUMEN.MN
