Түүх соёлын үнэт зүйлс хулгайн гар дамжин гадаад руу  гарсаар байгаа. Үүний мөрөөр хууль хяналтынхан ажилладаг ч хэргийн эздийг тэр бүр олж илрүүлж чадахгүй байна. Харин Үндэсний түүхийн музейгээс 2007 онд алдагдсан гэх 1000 гаруй үзмэрийн хэргээр тус музейд Сан хөмрөгийн эрхлэгчээр ажиллаж байсан Б.Энхбатыг баривчлан хорьж, олон сарын турш мөрдөн шалгасны эцэст шүүхээс долоон жилийн ял оноосон юм. Д.Энхбат бараг насаараа музейн сан хөмрөгт ажилласан нэгэн байв. Түүний хулгайлсан үзмэрүүд дотор нэн ховор бурхад, эртний эд өлгийн зүйлс олон байжээ. Нийтдээ 11 тэрбум төгрөгөөр үнэлэгдсэн гэдэг. Эдгээр үнэт зүйлсийг олон улсын хэмжээнд эрэн сурвалжлах ажил ч хийгдэж буй. Гэтэл саяхан Үндэсний түүхийн музейн сан хөмрөгт хийсэн тооллогын үеэр Д.Энхбатын хулгайлсан гээд байсан үзмэрүүдээс 70 гаруй нь музейдээ хадгалагдаж байсан нь тогтоогджээ. Энэ юуг харуулж байна гэхээр музейн сан хөмрөгийн бүртгэл тооцоо маш хангалтгүй байсныг илтгэж буй хэрэг юм. Нөгөөтэйгүүр, тус музейд байгаа нэн ховор бурхад,  эд өлгийн зүйлсээс ижил хэв загвартай, олон тоогоор байгааг нь нэг багц болгон тоолж, бүртгэлдээ “нэг” гээд  тэмдэглэж байсныг Д.Энхбаттай хамт ажиллаж байсан нөхөд нь хэлж байгаа ажээ.

Б.Баяр

Эх сурвалж tumen.mn