"Залуучуудын хөгжил, оролцоо"

үндэсний чуулганд оролцогчдод

“Залуучуудын хөгжил, оролцоо” үндэсний чуулганд Монгол орны өнцөг булан бүрээс залуучуудаа төлөөлөн оролцож буй Та бүхэнд энэ өдрийн мэндийг дэвшүүлье.

Улс орны ирээдүй болсон залуучуудын хөгжилд анхаарлаа хандуулж, эх орныхоо хөгжил, дэвшилд өөрсдийн оруулах хувь нэмэр, үүрэг, оролцоог тодорхойлж, мөн залуучуудын талаар төрөөс баримтлах бодлого, зорилт, тулгамдаж буй асуудлаар санал бодлоо нэгтгэхээр хуран чуулж буй залуучууддаа талархал илэрхийлж байна.

Түүхийн үе, шат бүрт залуучууд улс орны хөгжлийн түшиг тулгуур, хөдөлгөгч хүч нь тусгаар тогтнол, ардчилал, эрх чөлөөний баталгаа болсоор ирсэн билээ. Тиймээс бид залуу үеэ онцгойлон анхаарч үздэг юм.

Өнөөдөр манай залуучуудад хөдөлмөр эрхлэлт, нөхөн үржихүйн эрүүл мэндийн болон гэр бүлийн боловсрол, харилцааны ур чадвар, чанартай боловсрол эзэмших, архи тамхины хорт зуршилгүй амьдралын дадал хэвшилтэй болох зэрэг асуудлууд тулгамдаж байна. Эдгээрийг шийдвэрлэхэд төр засаг, иргэний нийгэм, залуучуудын байгууллага, залуу хүн бүрийн оролцоо чухал.

Оролцоо бол хөгжих, боловсрохын эх ундрага, үүрэг, хариуцлагаа хэрэгжүүлэхийн эхлэл байдаг. Тиймээс залуучуудын нийтлэг хүсэл сонирхол, эрх ашигт нийцсэн үйл ажиллагаа явуулж, тэдэнд эх оронч, хөдөлмөрч, эрх чөлөө, шударга ёсыг эрхэмлэгч, өв уламжлалаа хүндэтгэх үзэл төлөвшүүлэхэд чиглэсэн хөгжлийн бодлого боловсруулж, тэдний өөрсдийнх нь оролцоотой хэрэгжүүлэх нь манай төрийн бодлогын зарчим байх болно.

Бид Монгол орны ирээдүйг өөдрөг, гэрэл гэгээтэйгээр төсөөлөн харж байна. Гэхдээ залуучуудын оюун ухаан, цог золбоо, эрдэм чадал, хичээл зүтгэл, хувь нэмэр, үүрэг оролцооноос ихээхэн зүйл хамаарна гэдгийг энд тэмдэглэн хэлэх нь зүйтэй.

Өнөөдрийн залуучууд та бүхэн бол ахмад үеийнхээ хойчийг залгамжлагч, монголын ирээдүйг цогцлоон байгуулагчид. Тийм учраас салбарын яамны зүгээс хүн амын хамгийн чухал бүлгийн нэг болсон залуучуудын хөгжлийн талаар баримтлах бодлогын баримт бичгийн төслийг Монголын залуучуудын дуу хоолой болон олон улсын байгууллага, төрийн, төрийн бус байгууллагуудын санал, зөвлөмжийг тусган боловсруулаад байна. Энэ бол цаг үеэ олсон чухал ажил учраас Монгол Улсын Их Хурлын даргын хувьд энэхүү ажлыг бүрэн дүүрэн дэмжиж ажиллана гэдгээ Та бүхний өмнө илэрхийлж байна.

Монголын залуучууд ямагт тэнгэрлэг, хийморлиг, цог золбоотой байж, хүчирхэг Монголын өөдрөг ирээдүйг бүтээж, дэлхийн хөгжлийг тодорхойлохын өлзийтэй ерөөлийг дэвшүүлж, чуулганы үйл ажиллагаанд амжилт хүсье.

МОНГОЛ УЛСЫН

ИХ ХУРЛЫН ДАРГА ЗАНДААХҮҮГИЙН ЭНХБОЛД

Улаанбаатар хот 2015 оны 5 дугаар сарын 16-ны өдөр