Олны танил эрхмүүдийн үсээр ёстой л нэг “тоглох” шиг болдог мастер үсчин Н.Батжаргалыг хүмүүс “Матрикс”-ын Баачка гэх нь бий. Үсний хэв маяг, өнгө будгийг хэнээс ч илүү мэддэг авьяаслаг залуугийн баримталдаг зарчим нь үйлчлүүлэгчийнхээ сэтгэлзүйг мэдрэх. Тиймдээ ч, уг салоны үйлчлүүлэгчид үс зүсээ түүнд даатгадаг биз. “Үсийг чинь засна ч, хусна ч” гэж ирээд л найз нөхдөө цаашлуулж суудаг хөгжилтэй залуу нэгэн өдөр тун их бухимджээ.
Учир нь, түүний машины эмблем урт гартнуудын анхаарлыг татсан бололтой. Юу ч үлдээлгүй хуулж аваад алга болсныг нь хараад Баачка “Бүүр нэг гар нь загатнаад хулгай хийхгүй л бол болдоггүй хүмүүс байдаг юм шиг байна аа. Машины эмблем хүртэл аваад явчих юм, ёстой хогийн юмаа. Тэрийг зараад мөнгө болох уу. Ийм арчаагүй бодолтой, хүний юмыг илүү харж явдаг новшнуудын амьдрал тэр бодолтой нь адилхан байгаа шүү дээ. Хэлэх хараал ч олдохгүй юм” гэж үглэжээ.
Найз нөхөд нь түүнд автомашины сэлбэг зардаг газруудаар эрэх санал тавьсан ч улам их бухимдахын нэмэр гээд хөдлөөгүй аж. Үргэлж л инээж явдаг үсчин залуугийн уурыг барсан “урт гартнууд” хараал, ерөөлийн үгс дуулаагүй ч гэлээ, сайн энерги лав дагуулаагүй нь тодорхой биз ээ.
Б.Содон
