“Чингэлтэй дүүргийн 61-р дунд сургуулийн 3г ангийн 14 сурагчид хоолны хордлогот халдварын сэжигтэй тохиолдол илэрлээ” гэсэн мэдээллийн дагуу НМХГ-аас тандалт, хяналт хийж байна.
2016 оны 05 дугаар сарын 03-ний өдөр тус сургуулийн 1-р ээлжинд хичээллэдаг 1-3 дугаар ангийн 6 бүлгийн 202 сурагч “Үдийн цай” хөтөлбөрт хамрагдсанаас 3г ангийн 14 сурагчид 20-30 минутын дараагаас дотор муухайрах, бөөлжих, гүйлгэх, халуурах шинж тэмдгүүд илэрч ХӨСҮТ-д хүргэгдсэн байна. ХӨСҮТ-ийн гэдэсний халдварын тасагт дөрвөн сурагч хэвтэж, 10 хүүхдэд нь гэрээр зөвлөгөө өгч явуулсан бөгөөд, бусад ангийн сурагчдад дээрх шинж тэмдэг илрээгүй, хичээл сургалтын үйл ажиллагаа хэвийн явагдаж байна.
Тус сургууль нь сургуулийн өргөтгөлийн зориулалтаар баригдсан байранд сургалтын үйл ажиллагаа явуулдаг бөгөөд цайны газаргүй тул 1-5 дугаар ангийн 18 бүлгийн 610 сурагчид “Үдийн цай” хөтөлбөрийг “Айплмүүн”, “Хаан сүү” ХХК-тай гэрээ байгуулан, үйлдвэрээс өдөр тутамд нь нийлүүлж, хэрэгжүүлж байна.
2016 оны 05 дугаар сарын 03-ны өдөр “Үдийн цай”-ны бүтээгдэхүүнд нийлүүлсэн “Айплмүүн” ХХК-ийн жимст боов, “Хаан сүү” ХХК-ийн жимсний жүүс, нэг удаагийн соруул, сургуулийн хэрэглээний ус, мөн үйлдвэрүүдийн хүнсний түүхий эд, бүтээгдэхүүнээс дээж авч НМХГ-ын НТЛ-т шинжлүүлэхээр хүргүүлж ажиллалаа. 61-р сургууль, “Айплмүүн”, “Хаан сүү” ХХК-иудын хүнсний үйлдвэрүүдүүдэд НМХГ, ХӨСҮТ хамтран тандалт, хяналтыг хийж байгаа бөгөөд лабораторийн шинжилгээний хариуг эцэслэн гартал эдгээр үйлдвэрүүдээс “Үдийн цай”-ны нийлүүлэлтийг түр хугацаагаар зогсоогоод байна.
Б.Энхжин
