Ардчиллын түүхэнд анх удаа иргэд өөрсдийн чин сэтгэл, итгэл үнэмшлээр юунд хүрч болдгийг харлаа. Сэтгэл өвтгөм дүр зураг харсан иргэд Сүхбаатарын талбайд гарч жагссан нь энэ нийгмийн үнэт зүйл хийгээд эдлэх ёстой эрх чөлөөгөө эдэлж байгаа хэрэг. Засгийн газар, У.Хүрэлсүх ч ард иргэдийнхээ үгийг сонсож, нийгмийнхээ үнэт зарчмыг даган, түүхэндээ анх удаа хоёр сайдаа огцруулах шийдвэр гаргаж байв. Гэтэл МАН-ын ТУЗ хуралдаж, Засгийн газраа бүрэн бүрэлдэхүүнээр нь огцруулахаар болсон нь олны гайхширлыг төрүүлэв.

Арга ч үгүй. Бидний ардчилсан гээд 30 жил эндүүрч явсан нийгмийн мөн чанарыг жинхэнэ утгаар нь У.Хүрэлсүхийн Засгийн газар Монгол Улсын хэмжээнд тунхаглалаа. Магадгүй Азийн хэмжээнд тунхагласан түүхэн явдал болов. Үүссэн нөхцөл байдалд уялдуулан, хоёрын хоёр сайдаа огцруулсан Засгийн газар үлдэх бүрэн боломжтой. Гэтэл Ерөнхий сайд У.Хүрэлсүх нийгмийн үнэт зарчим, улс төрийн ёс зүйг баримтлан огцорч байгаа нь яах аргагүй түүхэн явдал болов. Нэг талдаа маш харамсалтай гэдгийг ард түмэн хэлж байна.  Харин ард түмний чин сэтгэлийн жагсаал цуглааныг улс төрийн зорилгоо болгон ашиглах гэсэн нөхөд цөөнгүй байв.

Тухайлбал, УИХ-ын гишүүн Ц.Туваан, АН-ын бүлгийн дарга Д.Ганбат нар хүртэл талбай дээр очиж, жагсагчдыг өдөн хатгасан. Үүний цаана Ерөнхийлөгч Х.Баттулгын явуулга ч байгааг ч эх сурвалжууд дэлгээд эхэлсэн. Энэ мэтээс харахад засаглалын тогтворгүй байдал үүсэх магадлал өндөр болж байсан учраас У.Хүрэлсүх зоримог шийдвэр гарган засгаа огцрууллаа. Хойд хөршид болж байгаа цуст мөргөлдөөнөөр жишихэд Монгол Улсад юу ч болж болох байв. Гэтэл нийгмийн үнэт зүйл, улс төрийн ёс зүйг Монгол Улсад нутагшуулахын төлөө У.Хүрэлсүхийн Засгийн газар энэ бүхнийг орхиж, ардчилсан нийгмийг сэрээх түүхэн гал асаасан явдал юм. Харин нийт ард түмэн ид хийж бүтээж байсан У.Хүрэлсүхийн Засгийн газрыг огцорсонд сэтгэл ихээхэн дундуур байгаа юм.

Эх сурвалж: З.Шатар

Түмэн.мн