ИХШХЕГ-ын байранд БНХАУ-ын иргэнийг цагдан хорьсон гэх асуудал олны анхаарлыг татаж байна. Уг хэргийг Чингэлтэй дүүргийн цагдаагийн хоёрдугаар хэлтэст шалгаж байгаа юм. Тодруулбал, МУ-ын иргэд бүлэглэн монголд сарын хугацаатай орчуулгын ажлаар ирсэн Ван Жан Гу гэгчийг айлган сүрдүүлж, мөнгө нэхэн хорьж дарамталсан гэх. Түүнийг цагдан хорьж байх хугацаандаа залуус хутга буу тулгаж, улмаар 50 сая төгрөг өгөхийг шаардсан гэж мэдүүлж байгаа юм.

Энэ талаар хоригдоод суллагдсан Ван Жан Гу-гаас зарим зүйлийг тодрууллаа.

 -Монгол залуус таныг цагдан хорьж, 50 сая төгрөг нэхэж дарамталсан гэсэн. Энэ талаар жаахан мэдээлэл өгөхгүй юу?

-Сүрдүүлсэн гэх таван залуугийн нэгийг л зүс танина. Тэдгээр залуус ямар ч шалтгаангүйгээр их хэмжээний мөнгө нэхэж хутга тулгаж сүрдүүлж бүх карт дансыг маань шалгасан. Улмаар 50 сая төгрөгний өртэй гэх бичгийг бичүүлж, наториатаар батлуулсан. Улмаар энэ мөнгийг таньдаг хамаатан садан, гэр орныхоосоо нэх хэмээн сүрдүүлж өдөр бүр утсаар яриулж байсан.

-Таныг хорьж байсан газрын хувьд албан байгууллага байсан гэсэн. Энэ талаар дэлгэрэнгүй мэдээлэл өгөхгүй юу?

 -Эхлээд голын эрэг, айлын хашаанд аваачиж дарамталж байсан. Байнга буу, хутга тулгаж байсан. Сүрдүүлэхдээ "Арьс махнаас чин салгаж нохойд өгнө, чамайг бид Монголын шоронд хийж чадна. Надад Монголын бүх газар үйлчилдэг. Шоронд орчихсон хойно чинь хүмүүсээр зодуулж байгаад л алуулчихна. Чамайг шороонд булаад, гол руу алаад хийчихсэн байсан ч хүн олохгүй. ДОХ-той эмэгтэйн цусыг шахана. Орой болохоор чамайг өвөртөлж унтаж, өвтгөнө" гэх үгсийг их хэрэглэж байсан. Мөн хэдхэн минутын зайтай гэр орон, танил талруу минь яриулж мөнгө нэхүүлсэн. Энэ бүх дарамтаас болж сахарын хууч өвчин маань сэдэрч, татаж унах гээд байсан. Сүүлийн гурван хоногт Иргэний харьяалал шилжилт хөдөлгөөний ерөнхий газрын байранд аваачиж хорьсон. Энэ газрыг би нисэх буудалтай ойрхон болохоор сайн мэдэж байсан. Тэнд яг хорих анги шиг тусгаарласан өрөөтэй. Надтай бас 5 хятад иргэн, 5 вьетнам иргэн хоригдож байсан. Би хятад хэл дээр "эдгээр хүмүүст би 50 сая төгрөгний өргүй" гэж ажилчдад бичиж өгсөн. Гэвч тэнд байсан хүмүүс шоолохоос өөр зүйл хийгээгүй. Харин биеийн байдал нь муудаж эхлэхэд цаг, цагийн зайтай даралтыг нь үзэж эм өгсөн.

-Энэ газраас та яаж гарсан юм бэ?

-Намайг аваачиж хориулсан залуу өөрөө батлан даалтад гаргасан. Харин Иргэний харьяалал шилжилт хөдөлгөөний газраас миний бичиг баримтыг батлан даалтад гаргасан залууд өгөөд явуулсан. Тэр залуу намайг тавьж явуулахгүй авч явсаар байсан. Улмаар бүр Өмнөговь руу авч явна гээд байж байтал цагдаагийн байгууллагаас намайг олж авсан.

Уг хэрэгт гэрчээр оролцож буй Ван Жан Гу-гийн монгол дахь найзаас нь зарим зүйлийг тодруулахад "Өнгөрсөн сарын 29-ний 11:00 цагийн орчимд Ван Жан Гу гэнэт надруу өөрийн утаснаас биш өөр дугаараас ярьсан. Ингээд би гэрээсээ гараад тосоод авсан. Дөнгөж уулзаад байтал нэг машин хажууд ирж зогсоод, дотроос нь хэдэн залуус гар ирсэнээ "“Амрыг эрье” цагдаагийн байгууллагаас явж байна гэж хэлсэнээ шууд үгийн зөрүү байхгүй энэ хүнийг цохиж, зодоод эхэлсэн. Улмаар намайг болиулах гэхэд намайг бас түлхэж унагааж, цохичихоод Ван Жан Гу-г машиндаа хийгээд аваад явчихсан. Машиных нь дугаар "63-26" УНУ байсныг би араас нь хараад үлдсэн. Үүний дараа Ван Жан Гу руу юу болоод байгааг асууж утсаар ярихад "санаа зоволтгүй, би зүгээр" гэж хэлсэн. Тиймээс би цагдаагийн байгууллагад мэдэгдэлгүй долоо хоног хүлээсэн боловч Ван Жан Гу-гаас нэг ч холбоо бариагүй. Тиймээс учир явдлыг хэлж цагдаагийн байгууллагад хандсан байгаа. Ингээд цагдаагийн байгууллага түүнийг олж ирэхэд энэ хүн биеийн байдал маш муу, үргэлж хамар амнаас нь цус гардаг болчихсон, маш их дарамт сүрдүүлгээс ирж байгаагаа хэлж цагдаагийн байгууллагад гомдол гаргасан. Миний хувьд уг хэргийн гэрчээр татагдаад байгаа. Ерөнхийдөө энэ хүнийг гадаад иргэн гэдгээр нь олзолж аваад ашиг олох гэсэн залуусын үйлдэл гэж ойлгож байна" гэлээ.

Мөн энэ талаар мөнгө нэхэмжилж, дарамталсан гэх Г.Түмэнжаргалаас тодрууллаа.

 -Та яагаад тэр хүнээс мөнгө нэхэж дарамталсан юм бэ?

-Мөнгө нэхэж байсан нь үнэн. Гэвч би өөрийнхөө мөнгийг нэхэж байсан. Харин тэр В гэх хүнийг буудалд аваачиж дарамталсан асуудал огт байхгүй. Би баттай хэлье. Би өөрөө хохирогч.

-В-г буудалд аваачин хорьж, мөн ИХШХЕГ-т гурав хоног хонуулсан гэсэн?

-Өнгөрсөн тав дахь өдөр В гэх тэр өвөрмонгол нөхрийг зочид буудалд байгааг нь би мэдээд очсон. Гэхдээ жолоочтойгоо хоёулханаа байсан. Ингээд аялал жуулчлалын визтэй гэж яригдаад байгаа бичиг баримтгүй өвөрмонгол хүн Монголд орж ирээд үнэт чулуу, самар авч хил гарах гэж байна гэсэн мэдээллийг би Иргэний харъяалал, шилжилт хөдөлгөөний ерөнхий газарт утсаар өгсөн. Харин тус газраас “Үнэхээр тийм асуудал байгаа бол наад хүнээ бие болоод сэтгэл санаанд нь ямар нэгэн хохирол учруулахгүйгээр аваад ирэх боломж байна уу. Бид визний, бичиг баримтны зөрчилтэй байгаа эсэхийг нь шалгаад тогтоогоод өгье” гэсэн. Тэгэхээр нь би энэ В гэх хүнийг тэр өдрийн оройхон тус газарт шалгуулахаар хүргэж өгсөн нь үнэн. Харин буудалд дөрөв хоног байлгаж, дарамталсан гэдэг нь ор тас худлаа мэдээлэл юм шүү. Ингээд гурван хоногийн дараа буюу нэг дэх өдөр нь тус газраас намайг дуудаад “Энэ хүн ямар нэгэн визний зөрчилгүй байна. Тиймээс бичиг баримтыг нь өгөөд явууллаа” гэсэн. Би тэндээс гараад Баянзүрх дүүргийн цагдаагийн нэгдүгээр хэлтэст очиж, залилуулсан гэж өргөдөл гомдол өгч, асуудал үүсгүүлсэн.

-Та 50 сая төгрөгөө В-д яг хэзээ зээлсэн юм бэ?

-Би энэ хүнд 2015 оны дөрөвдүгээр сарын 20-нд 50 сая төгрөгийн бараа зээлсэн юм. Тэрнээс хойш би удаа дараа зээлсэн мөнгөө авъя, өрөө барагдуул гэж ярьж хэлсэн боловч өдий хүртэл өгөхгүй явсаар байгаа нь энэ. Тэгсэн хэрнээ Монголд өчнөөн удаа орж гараад явчихсан байдаг. Ер нь залилангийн шинжтэй нөхөр байгаа байхгүй юу. Хамтран амьдрагч нь бололтой хамт явдаг М гэх нэг хүүхэн байна. Тэр хүүхэн л худал мэдээлэл тарааж, миний нэр хүндэд халдаад яваа гэж бодож байна. Би хэлж ярьсан зүйлийнхээ хариуцлагыг хүлээж чадна. Монгол хүн, Монгол Улсын иргэн эх орондоо байхад гадаадын нэг луйварчин ирээд хохироогоод, Монгол хүүхэнтэйгээ нийлэн намайг, миний гэр бүлийнхнийг заналхийлж, дарамтлаад байгаа нь хууль бус биз дээ. Сүүлдээ намайг п-ээр нь харааж ерөөгөөд, “Энэ 50 сая төгрөг чинь юу ч биш, жаахан мөнгө ш дээ. Чи юун сүртэй юм. Би чамд өгнө” гэж утсаар ярьсан. Аялал жуулчлалын визтэй орж ирчихээд хууль бусаар цагаан, ногоон хаш, мана гэх мэт үнэт чулууг хууль бусаар гаргадаг хүн юм билээ. Мөн хууль бусаар самар авч урагшаа хил давуулдаг луйварчин. Гэтэл эднийг манай цагдаа, хууль хняалтын байгуулагууд хянаж, шалгаж чадахгүй байна шүү дээ. Монголын хил гаалийнхантай хуйвалдаад, үнэт чулуу зарж үлэмж хэмжээний ашиг олоод байдаг. Тэгсэн хэрнээ Монголын нэг иргэн энэ хүнд хулхидуулчихлаа гээд цагаачлалын алба, Иргэний шилжилт хөдөлгөөний газарт нь хандахаар “Визний зөрчилгүй юм байна. Ханддаг газраа ханд” гээд авч хэлэлцэхгүй байгаа юм.

Уг хэргийг Чингэлтэй дүүргийн цагдаагийн хэлтэст шалгаж байна.

Б.Чимэг