Хөгжлийн банкны 33 тэрбумын зээлээр УИХ-ын гишүүн болсон гэх Хассуурийн Ганхуяг хууль зөрчин хилийн зурвас газрыг олборлож байна.

Улсын хил халдашгүй дархан байхыг Хилийн тухай хуулиар баталгаажуулсан байдаг. Гэтэл Дорнод аймгийн Баянтүмэн сумын нутаг дахь Хилийн 0132-р ангийн 2-р заставын орчим, улсын хилээс 5 хан км-т “Меланж” гэх компани нүүрс олборлолт эхлүүлсэн нь нутгийн иргэдийн эсэргүүцэлтэй тулаад байна. Энэ компаний ард 60 тэрбумын улс төр, бизнесийн маш том бүлэглэл байгааг өмнө нь дурдсан. Тэднээс өнөөдөр хамгийн том эрх мэдэлтэй нь УИХ-ын гишүүн Хассуурийн Ганхуяг юм. Хилийн зурваст хөрс хуулалт хийж байгаа “Вертекс майнинг партнер” компани түүнийх. Мэдээж бүртгэл дээр өөрийнх нь нэр байхгүй. Мөн хөрөнгө орлогын мэдүүлэгтээ дурьдаагүй. Гэхдээ “Вертекс майнинг партнер ” компаний гүйцэтгэх захирлаар УИХ-ын гишүүн Х.Ганхуягийн төрсөн дүү Хассуурийн Хашчимэг ажиллаж байна. Энэ бол тус компанитай УИХ-ын гишүүн Х.Ганхуяг хамаатайг нотлох баримт мөн. Нэмэлт баримт хэрэгтэй бол энэ компаниар дамжуулан Хөгжлийн банкнаас 33 тэрбумын зээлийг тус банкны захирал асан одоогийн УИХ-ын гишүүн Г.Амартүвшинтэй хамтран УИХ-ын гишүүн Х.Ганхуяг,Г.Дамдинням нар авсан нь нь ил болсон. Тухайн үед тус компаний хувьцааг УИХ-ын гишүүн Г. Дамдинням эзэмшиж байсан. Өнөөдөр тэрээр компаний бүртгэлээс өөрийнхөө нэрийг хасуулжээ.

“Вертекс майнинг сервис “ компаний олборлолт эхлүүлсэн улсын хилийн зурвас гэдэг бол иргэн аж, ахуйн нэгж хэн ч улсын хил хамгаалах байгууллагын зөвшөөрөлтэйгээр нэвтэрдэг, тусгай дүрэм журам мөрддөг онцгой бүс билээ. Хилийн тухай хуулийн 26.3.1-д хилийн зурваст олборлолт явуулах байтугай газар эзэмшүүлэх, өмчлүүлэхийг хориглосон байдаг. Хилийн шугамаас дотогш 15 км-ээс илүүгүйгээр тусгай журам тогтоосон байх шаардлагатай байдаг. Гэтэл УИХ-ын гишүүний дархан эрхээр далайлган дархан хилд халдах эрхийг Х.Ганхуягт хэн өгөв?

Өнөөдөр бүхэл бүтэн хилийн застав хаалгаа дэлгээд хилийн зурвастаа хэдэн зуун техник оруулаад, бүр газраа ухуулдаг ямар том эрх мэдэл вэ?

Үндсэн хуулиа баталж, парламентийн засаглалыг сонгосны 30 жилийн ой өнөөдөр тохиож байна. УИХ-ын гишүүний халдашгүй эрх нэрийн дор парламентад бүлэг дээрэмчдийг оруулж , бүтэн улсаа тонуулахыг 30 жилийн өмнө Үндсэн хуулиар тунхаглаагүй биз дээ.

Хамгийн гол нь Дорнодын хар шороон хөрс бол Монголд байтугай дэлхийд ховорхон баялаг. Энэ хөрсийг сүйтгэж нүүрс ухлаа гэхэд Хассуурийн Ганхуяг тэргүүтэй хэдхэн гэр бүлийг л баяжуулна. Харин бүтнээр нь үлдээвэл .Монголчуудыг хэдэн үеэр нь эрүүл хүнсээр хангах нөөц тэнд бий. Цөлжилт, усгүйдэл, бэлчээрийн даац хэтэрсэн энэ үед үлдсэн үржил шимт хөрсөө хамгаалж үлдэх нь Монгол төрийн бодлого биш үү? Эсвэл өнөөдөр ухаж л байвал ирээдүй бидэнд хамаагүй юм уу?

Ганцхан энэ үеэр л Монгол улс дуусах гэж үү?

Баялагтаа эзэн нь МАН юм уу? Монголын ард түмэн юм уу ? Монгол улсын Ерөнхийлөгч өө?

/Хассуурийн Ганхуягийн компани болохыг батлах баримтуудыг хавсаргалаа./

Сэтгүүлч Б.Отгон 2022.01.13