Нийслэлийн Засаг дарга Д.Сумъяабазар буруу талдаа жолооны хүрдтэй автомашиныг импортлохыг хориглох саналаа Засгийн газрын хуралдаанд хүргүүлэх талаар мэдээлэл өгөв.

Тэрбээр "Манай улсын авто замын хураамж Афганистанаас тав дахин бага. Хот өртөг өндөртэй, хот руу орж ирж байгаа иргэд татвараа төлдөг байх ёстой. Ингэж байж зохицуулалтыг хийж, түгжрэл болон төвлөрлийг сааруулна. Орон нутагт мэдээж ажлын байрны асуудал яригдана.

Буруу талдаа жолооны хүрдтэй автомашиныг импортлохыг хориглох саналыг он гараад Засгийн газрын хуралдаанд хүргүүлнэ. Улаанбаатар хотын авто замын хөдөлгөөнд 615 мянган тээврийн хэрэгсэл оролцож байгаа. Автомашины тоо жилд 80 мянгаар нэмэгдэж байгаа. Буруу талдаа жолооны хүрдтэй автомашиныг хориглохыг 2024, 2025, 2026 он гэх үү гэдгийг асуулга явуулж байгаад шийдэж болно.

Гол нь импортоор орж ирж байгаа буруу талдаа жолооны хүрдтэй тээврийн хэрэгслийг зогсоох хэрэгтэй байна. Нийслэлийн замын хөдөлгөөний даац хэрээс хэтэрсэн. Дорвитой алхам хийгээд Улаанбаатар хотыг 2030 он хүртэл хөгжүүлэх төлөвлөгөөг УИХ-д дэлгэрэнгүй танилцуулна" гэлээ.