“-Миний бодож байгаагаар энэ хэрэгт хөндлөнгийн ямар нэгэн нөлөө орж байхыг үгүйсгэхгүй. Хэргийн явц аажимдаа миний охиныг  баривчилж хорих хүртэл өрнөж байгаагийн цаана ямар нэгэн утга агуулга байгаа юм болов уу. Яагаад гэвэл, 2016 оны сонгууль угтаж манай хүргэн, охины минь нөхөр С.Зоригийн амь насаа алдсан хэрэг дахин сөхөгдөж гарч ирж байгаа шүү дээ. Өнгөрсөн дөрвөн удаагийн сонгуулийн өмнө талийгаач хүргэний маань амь насаа алдсан аймшигт хэргийг гаргаж ирж шоу хийж байсан. Энэ удаа ч түүний л нэгэн адил шоу үүсгэв үү гэж харж байгаа. Тиймээс энэ удаагийн үйл явдлыг хэр зэрэг үнэний хувьтай  вэ гэдэгт эргэлзэж байна.” хэмээн өдгөө хоригдон шалгагдаж байгаа Б.Булганы ээж Д.Байгальмаа хэвлэлд ярилцлага өгөхдөө өгүүлсэн байдаг. Түүнийг ийн ярьснаас хойш ямарч байсан 5 сарын хугацаа өнгөрчээ. Б.Булган чухам яг ямар хэрэг үйлдсэн талаарх мэдээллийг хуулийнхан гадагшлуулаагүй, хорьсон хэвээрээ байгаа юм. Хэрэв үнэхээр сонгууль угтсан хөзөр мөн бол гаргаж ирэх цаг нь ойртож байгаа харагдана. Ер нь бол С.Зориг агсны аллагын хэргийн учиг зангилааг тайлах оролдлого сонгууль дөхөхөөр идэвхжиж эхэлдэг нь нэгэнтээ жишиг маягийн болоод удаж дээ. Яахав, өнгөрсөн сонгуулиар харьцангуй бага хэмжээнд яригдсан гэхэд болох байх. За харин энэ жилийн тухайд Ш.Отгонбилэг агсныг С.Зоригийн аллагын  хэрэгт хамаатуулсан мэдээлэл сэлтийг хэвлэлээр явуулж, бас Б.Булганыг хорьж шалгаж байгаа зэргээс харахад АН-ынхан Б.Булганаар шоу хийх гээд байж ч болохоор шиг. Ямартай ч уг асуудлыг дагаад олон л өнцгүүд харагдаж байгаа юм.

Мэдээллүүдээс үзэхэд С.Зориг агсны эхнэр Б.Булган болоод өөр хоёр хүнийг сэжигтнээр татан шалгаж байгаа гэх.  Өнгөрсөн жилүүдэд, ерэн найман оноос хойш уг аллагын хэрэгт олон хүнийг шалгаж байсан, харин  Б.Булганы тухайд гэрчээр татагдаж байсан билээ. Гэхдээ өнгөрсөн жилүүдэд түүнийг эл хэрэгт ямар нэг хэмжээгээр холбоотой байсан юм биш байгаа гэх хардалт нийгэмд байж ирсэн нь үнээн. Гэсэн ч С.Зоригийн аллагын  хэргийг илрүүлэхээр 17 жил бэлэн  байдалд  ажиллаж ирсэн Ажлын хэсэг заавал яг сонгуулийн өмнө учиг олдог нь бас л сонин давхцал биш гэж үү? Ямартай ч Б.Булганыг нэлээд чанд хатуу байдлаар шалгаж байгаа гэх мэдээлэл байсан. Эргэлт оруулахгүй, 24 цагийн турш хурц гэрэлтэй өрөөнд байлгаж байгаа гэж байсан ч, зарим эх сурвалжууд бол үгүйсгээд байгаа. Б.Булганы ар гэрийнхэн  УИХ-ын Өргөдлийн байнгын хороонд   өргөдөл өгсөн байдаг. Б.Булганы ээж Д.Байгальмаа өргөдөл гаргах болсон шалтгааныхаа тухайд “…Биднийг огт уулзуулахгүй, тэр байтугай сүүлийн үед өмгөөлөгчийг ч оруулахгүй байгаа. Охин минь өвчин хууч ихтэй, тэр нь сэдэрч байгаа болов уу гэж  санаа зовж байна. Өнөөдрийг хүртэл бид биеийн байдлыг нь мэдэхгүй сууж байна даа”, “…Эргэлт оруулахгүй байгаа. Хоёрхон удаа л хувцсыг нь сольсон. Ер нь бол 24 цагийн гэрэлтэй нөхцөлд байлгадаг юм шиг байна лээ” гэхчлэн ярьсан байдаг юм.

Харин Өргөдлийн байнгын хорооны дарга Ж.Батзандан   “С.Зориг агсны гэр бүлийн хүн Б.Булганы ээжээс ирсэн өргөдлийг манай байнгын хорооноос Монгол Улсын Ерөнхий прокурорт шилжүүлж, шалгуулж байна. Мөрдөн шалгах ажиллагааны явцад хэний ч эрх ашиг зөрчигдөх ёсгүй. Хэн нэгнийг эрүүдэн шүүх замаар мөрдөн шалгах ажиллагаа явуулахыг хориглодог…  Миний бие ӨБХ-ны даргын хувьд прокурорт хүсэлт гаргаж, Б.Булгантай уулзах бодолтой байгаа. Тэр хүнийг шалгаж байгаа нөхцөл байдлыг биечлэн харахыг хүсч байна. Аливаа хэргийг шалгахдаа Монгол хүний үндсэн эрхийг эдлүүлэх ёстой. Хэрэв зөрчил байгаа бол түүний эсрэг хуулийн арга хэмжээ авна.”  гэж дуугарсан бол  Ё.Сагсай  хэлэхдээ “Талийгаач С.Зориг агсантай холбоотой хэрэг. Үүнд цагдаа, тагнуулын байгууллагын хамтарсан ажлын хэсэг шалгалтын ажиллагаа явуулж байгаа. Прокурорын байгууллага хамтарсан ажлын хэсэгт хяналт тавьдаг. Тэгэхээр нэгэнт хэрэг маань нууцын зэрэгтэй явж байгаа учир ажлын хэсгийн үр дүн гэдэг чухал. Ар гэр, шаардлагатай гэр бүлийн гишүүд, өмгөөлөгчдийг уулзуулах асуудал журам зааврын дагуу шийдүүлж болох байх. Энэ бүх өргөдөлтэй танилцсаны дараа албан ёсоор хариуг өгнө” гэж хэлсэн байгаа.

Тэгвэл О.Баасанхүү гишүүн хэлэхдээ  “Энэ хэрэг ямар шалтгаанаар нууцын зэрэглэлд орсон гэдэг албан ёсны тайлбараа УИХ-ын гишүүн миний нэр дээр ирүүлбэл сайн байна. Байцаан шийтгэх үйл ажиллагаанд хэн ч хөндлөнгөөс оролцох эрхгүй. Гэхдээ хууль хэрэгжүүлэхийг шаардах эрх нь УИХ-ын гишүүнд байдаг. Б.Булган гэж хүний хорих хугацааг сунгасантай холбоотой түүний ээж Д.Байгалмаа надтай яриад “Би 80 гарсан хүний хувьд эрүүл мэнд хүнд байна. Гэхдээ нөхцөл байдлыг тэвчээртэй харж байгаа. Хамгийн гол нь үр хүүхэдтэйгээ уулзмаар байна” гэсэн. Хэрэгт шууд хамааралтай үгүйг би мэдэхгүй. Гэхдээ хамааралгүй бол гэр бүлийнхээ хүнтэй уулзах эрхтэй гэж үзэж байна” гэж ярьсан байгаа юм.

За ямарч байсан нөхдүүдийн байр суурь иймэрхүү байгаа. Б.Булганы ээж бол “охиноо ямар нэгэн хэргийн золиос болох вий гэсэн бодол миний сэтгэлд  цаг үргэлж төрж байна. Ер нь бол шалгадаг, хянадаг байгууллагууд нь үе үе охиноос юм асууж, тайлбар авдаг шиг билээ. Тэр болгоныг надад ярьж байсангүй. Хааяа л Зоригийн асуудлаар ажлын багтай уулзаад ирлээ гэдэг байсан.  Түүнээс өөр зүйл хэлж байсангүй. Гэхдээ өнгөрсөн 17 жилийн хугацаанд энэ хэргийг сонгуулийн өмнө л гаргаж ирдэг. Бид ч үүнийг анзаарч мэдэж байдаг. Энэ удаа ч охиныг минь Төв аймгийн урьдчилан хорих төвд хориход бид сонгуулийн шоу эхэлж дээ гэж бодсон. Гэтэл хэрэг явдал сунжирч байна. Ямар нэгэн хэрэгт холбогдуулах гэсэн гаднын хүч байж магадгүй гэсэн бодол төрж байна. Гэхдээ энэ эх хүний бодол л юм даа.” хэмээн ярьсан байгаа юм.

Мэдээж өнгөрсөн 17 жилийн туршид илрээгүй С.Зоригийн аллагын жинхэнэ гэмтэн тодроосой гэсэн хүлээлт Монголчуудад бий гэдэгт эргэлзэх юун. Харин уг хэргээр ээлжит шоугаа хийх гэж байвал тун харамсалтай хэрэг юм. За тэгээд үнэхээр ээлжит шоуны нэгээхэн хэсэг юм бол угтах нэг сарын хугацаан дотор аандаа асуудал дэгдэх биз. Хэрэв эсрэгээрээ хуулийн байгууллагынхан  жинхэнэ гэмтнүүдийг учигтай нь гартаа оруулчихаад байгаа бол өөр хэрэг билээ.

Б.Тамир

Эх сурвалж: Шуурхай.мн