Өчигдөр буюу есдүгээр сарын 27-нд болсон аймаг цэргийн цолтой бөхчүүдийн нээлтийн барилдаанд Дорнод аймгийн харьяат аймгийн заан Х.Алтансүх урамтай сайхан барилдаж түрүүллээ. Тэрбээр аймгийн цолтой бөхчүүд дундаа л эрэмбэ өндөртэй бөхчүүдийг дарааллуулан өвдөг шороодуулав. Алдалж хөлд орох, хүний хийсэн мэхэнд хариу мэх хийн унагаах мөн шуудагдсан барьцнаас сайн барилдаж байлаа. Ер нь гар, сарвуу урттай Б.Гончигдамба гарьдтай тун төстэй барилдаантай залуу байсан.
Тэрбээр Аймгийн арслан Б.Чимэдвандангаар гурав, аймгийн арслан Б.Хишигбаатараар дөрөв, аймгийн арслан Ш.Пүрэвгарьдаар тав, аймгийн арслан А.Отгонбаатараар зургаа, хурц арслан Ш.Мөнгөнбаатараар долоо, хурц арслан Н.Жаргалбаяраар найм даван түрүүлсэн юм. Өмнө нь аймгийнхаа наадамд 5 дараалан шөвгөрч байсан бөх гэнэ. Энэ жилээс Бөхийн өргөөний барилдаануудад барилдах бололтой амжилт хүсье.
