Төр “Капитал” банканд даатгуулагчдын 375 тэрбум төгрөгийг байршуулаад алдсан. Тэгвэл энэ удаа Чингис хаан банканд татвар төлөгчдийн их хэмжээний мөнгийг дахин байршуулж, үндсэндээ нохойн замаар оруулжээ. Тодорхой хэлбэл, 2009 онд Нийгмийн даатгалын ерөнхий газар Чингис хаан банктай Хамтран ажиллах гэрээ болон Мөнгөн хадгаламжийн гэрээ байгуулж, татвар төлөгчдийн 96 тэрбум төгрөгийг байршуулсан аж. Нийгмийн даатгалын үндэсний зөвлөлийн шийдвэрээр энэхүү гэрээг хийсэн гэдэг. Гэвч Чингис хаан банк 2019 оны аравдугаар сараас эхлэн Банкны тухай хуулийн 16.1.1-т заасан “... хадгаламж эзэмшигч, харилцагчийн мөнгөн хөрөнгийг бүрэн байлгаж, тэдгээрийн анхны шаардлагаар гаргаж өгөх, шилжүүлэх” үүргээ биелүүлээгүй байна. Товчхондоо, нийгмийн даатгалын төлбөр тооцоог хугацаанд нь гүйцэд гаргах өгөх чадамжгүй болжээ. Тиймээс Нийгмийн даатгалын үндэсний зөвлөл 2020 оны ч есдүгээр сард Чингэлтэй дүүргийн Иргэний хэргийн анхан шатны шүүхэд хандаж, Нийгмийн даатгалын сангийн 101 тэрбум төгрөгийг гаргуулахаар нэхэмжлэл гаргажээ. Тийм хэдий ч Чингис хаан банканд байршуулсан татвар төлөгчдийн мөнгийг авч чадаагүй байна.