УИХ-ын гишүүн “фортуна” Н.Батбаяр, “салаавч” Г.Баярсайхан нар Төрийн ордонд согтууран чуулганы хуралдаанаар агсам тавьж, “монос”-ын Л.Эрдэнэчимэгийг нүцэглэснээс хойш  “Төрийн ордонд архи ууж, нүцгэн хүүхэн харъя” гэх хэлц үг бий болжээ.

Зөвхөн ийм хэлц үг гараад зогсохгүй үйлдлээр үзүүлсэн ч яахав гэх шийдэмгий хүмүүс олон болж байгаа юм байх. Болохгүй нь юу байхав, Төрийн ордон орж, “фортуна”, “салаавч” хоёртой хундага тулгачихаад “монос” тэргүүтэн бүсгүйчүүдээ нүцгэн харж сэтгэл баясгаад гарахад яагаад болохгүй гэж. Аз таарвал Д.Болд мэтийн “Монгол поп” гэсэн балай тоглолт ч үзэж мэднэ гээд манай Төрийн ордон ч нүд баясгаж, чих мялаах зүйл олонтой болжээ. УИХ-ын болон байнгын хорооны хуралдааны хэрүүл, худал хоосон амлалтаас хамаагүй зугаатай байгаа биз дээ.

Биднийг анх парламентийн сэтгүүлч хэмээн Төрийн ордны босгоор хөл тавьж ахуй цагт ордны харуул хамгаалалт шалгаад жигтэйхэн байдаг сан. Арай л ам хамар ухаж төнхөдөггүй байлаа. Одоо ч сэтгүүлч бид ийм л шалгалтыг даваад Төрийн ордон руу нэвтэрдэг. Архи амсах нь бүү хэл урьд шөнө нь уусан байхад л тэр хаалгаар нэвтрэх эрхгүй хөөгдөөд гардаг. Архи уусан бүү хэл амссан гишүүн ч гэж байхгүй. Ийм мэдээлэл ч уншигч та урьд өмнө сонсоогүй болов уу. Эмэгтэй сэтгүүлчдийг богино банзал өмслөө, гуя хасаа гялалзуулалаа гээд хөөгөөд л явуулна. Ямар ч яриа хөөрөө байхгүй.

Харин өнөөдөр манай Төрийн ордон ч миний дээр дурдсанчлан нүд баясгаж, чих мялаах зүйл олон болжээ. Гишүүд нь УИХ-ын чуулганы хуралдаанаар согтуу агсам тавьж, эмэгтэй гишүүд нь хурлын танхимд гуя хасаа гялалзуулан сууж байхад уйдаад байх нь хаашаа юм бэ. Бүр чуулганы индэр дээр төрийн түшээ нь агсам тавьж байхад яагаад уйдна гэж. Элдэв олон суваг сольж, реклам хараад зүхэж суухгүй амар. Хэдэн хошин шогчдын тоглолт үзэж байхаар “фортуна”, “салаавч” хоёрынхоо хэрхэн агсам тавихыг харж суух нь хэн хэндээ зүгээр биз дээ.

Загварын шоу үзэх гэж билетэнд оочёрлож байхаар “монос” мэтийнхээ нүцгэн биеийг харчихгүй юу. Голоод яахав дээ, үнэгүй юм чинь.

Ч.Доржбат