Нийслэлд үйл ажиллагаа явуулж, иргэдэд үйлчилж буй хувийн автобус компаниуд өнөөдөр 06.00 цагаас эхлэн ажил хаялт зарласан. Учир нь “Улаанбаатар смарт карт” компани тэдний цалинг өгөхгүй байгаатай холбоотой юм. Одоо хувийн автобусны компаниудын удирдлагууд “Смарт карт” компанийн удирдлагуудтай уулзаж байгаа бөгөөд тодорхой шийдэлд хүрээгүй байгаа гэнэ.
Одоогоор нийтийн тээврийн үйлчилгээнд “Нийтийн зорчигч тээврийн нэгтгэл”-ийн болон хувийн “Мяралзаа”, “Эрдэм транс”, “Эмсид” компанийн автобуснууд явж байгаа юм байна. Хувийн автобуснууд ажил хаясантай холбогдуулан, улсын автобуснууд ачааллаа дийлэхгүй байна. Тодруулбал, Зарим автобусны смарт карт уншигч нь ачааллаа даахгүй, гацаад картаа уншихгүй, Харин зарим автобусны хүмүүс нь орох хаалгаараа багтахгүй, буух хаалгаараа мөнгө төлөлгүй зорчиж байгаа харагдсан.
Мөн “Автобуснууд ажил хаях гэж байгаагаа албан ёсоор мэдэгдээгүй учраас бараг цаг гаруй автобус хүлээж зогслоо. Өөр автобусанд дамжаад суух гэсэн боловч багтахгүй байна. Ажил, хичээлээсээ хоцорлоо” гэсэн хүмүүс автобусны буудлаар дүүрэн байсан юм. Бид ажил хаялтын талаар болон цалингийн асуудлаар “Улаанбаатар смарт карт” компани болон Нийслэлийн тээврийн газраас тодруулах гэсэн боловч “Одоогоор мэдээлэл өгөх боломжгүй” гэсэн юм.
Ажил хаялтын талаар “ЭМСИД” компанийн жолооч Н.Энхбаяраас тодрууллаа.
-Жолооч нар ямар учраас ажил хаялт зарлачихсан юм бэ?
-“Смарт карт” компани хувийн автобус компаниудын цалин олгоогүй учраас бүх хувийн компаниуд өнөөдөр өглөө ажил хаясан. Удирдлагууд маань “Смарт карт” компанийн удирдлагуудтай уулзахаар явсан. Дөнгөж сая залгаад одоо ажилдаа гар гэж хэлсэн. Тиймээс манайхан эхнээсээ ажилдаа гарч байна.
-Тэгэхээр цалингийн асуудал шийдэгдсэн гэсэн үг үү?
-Үгүй ээ. Шийдэгдээгүй юм шиг байна лээ. Орой дахиад хуралдан гэсэн.
-Бусад хувийн компаниуд бас ажилдаа гарсан уу?
-Үгүй. “Мяралзаа”, “Эрдэм транс” компанийн автобуснууд явж байгаа. Одоо манайх гарч байна.
Нийтийн тээврийн шинэчлэл буюу “U money” картыг ашиглаж эхэлснээр багагүй алдагдал хүлээсэн гэж эх сурвалжууд мэдээлж байна. Тиймээс цалингаа тавьж чадахгүй байдалд хүрсэнээр ийнхүү ажил хаялт зарласан байж болзошгүй байна. Энэ талаар бид эргэн мэдээлэх болно.
Т.Болормаа
