Чөлөөт бөхийн Ази тивийн аварга шалгаруулах тэмцээнд маргааш эхэлнэ. Гэтэл тэмцээнд явсан 17 тамирчны гурав нь Дубайн онгоцны буудал дээр саатуулагдсан тухай бид мэдээлсэн. Тодруулбал, Д.Гомбодорж 74 кг, тамирчин Д.Хүдэрбулга 97 кг-ийн жинд тавдугаар сарын 7-ны пүрэв гаригт, тамирчин Н.Золбоо 125 кг-ийн жинд маргааш буюу лхагва гарагт барилдах хуваарьтай байсан аж. Гэтэл тэднийг визний зөрчилтэй хэмээн буцаасан юм. 

Тэгвэл энэ талаар Монголын Чөлөөт бөхийн холбооны ерөнхийлөгч Д.Дагвадорж цахим хуудаснаа “Катарын Дохад өглөөнөөс хойш тамирчдынхаа талаар асууж сураглаж, хөөцөлдөж цөхрөнгөө барж байна. Катарын бөхийн холбооноос Монголын баг тамирчид нэрсээ тулгаж өгсөн нэрийн доор Монголын гурван тамирчин, нэг багшийн нэрийг оруулаагүй байна. Тэд бидний өөдөөс хууль ярьж ам таглаж байна. Манайхаас бусад Узбъек зэрэг улсууд  байна” хэмээн бичжээ. 

Хэдийгээр МЧБХ-ны ерөнхийлөгч Д.Дагвадорж Азийн чөлөөт бөхийн холбооны ерөнхийлөгчтэй энэ асуудлаар ярилцаж, асуудлыг шийдэхийг оролдсон ч бүтэлгүйтсэн бөгөөд Монгол руу буцсан гурван тамирчин маргааш болох тэмцээндээ орох боломжгүй болжээ. Ингэснээр манай улсын дээд жингийн гурван тамирчин барилдахгүй, харин бусад тамирчин хуваарийнхаа дагуу тэмцээндээ оролцох гэнэ.