210 сая төгрөгний төлөө БНХАУ-ын иргэдийн аминд хүрсэн хэрэг олны анхаарлыг татаж байна. Тодруулбал, энэ сарын 11-ний  23.40 цагийн орчимд Баянгол дүүргийн хоёрдугаар хорооны...... дугаар байрнаас хоёр хүний цогцос олдсон харамсалтай хэрэг гарсан юм. Амиа алдсан иргэдийн хувьд БНХАУ-ын иргэд байсан нь шинжээчдийн дүгнэлтээр тогтоогдоод байна. Талийгаачид манай улсад бизнес эрхэлдэг мөнгөтэй хүмүүс байжээ.

 Гэмт этгээдүүд хил давахаар төлөвлөж байжээ

 Хятад иргэдийн аминд хүрсэн хэргийн сэжигтнээр Баянгол дүүргийн дөрөвдүгээр хорооны иргэн 26 настай Г гэгчийг баривчлаад байгаа юм. Мөн түүнтэй хамт хэргийг үйлдсэн хэмээн гурван хүнийг ШШГЕГ-ын харьяа цагдан хорих 461 дүгээр ангид саатуулаад байна. Тэднийг хэрэг үйлдсэнээс хойш зургаан цагийн дотор Улаанбаатар хотын цагдаагийн газар, Баянгол дүүргийн цагдаагийн нэгдүгээр хэлтэс, Дархан, Сэлэнгийн цагдаагийн 700 гаруй алба хаагч мэргэжлийн ур чадвар гарган шуурхай илрүүлэн баривчилсан аж. Тэдний хоёрыг Улаанбаатар хотоос, хоёрыг нь Дарханаас саатуулжээ. Тэд ОХУ-ын хилийг давахаар төлөвлөж байсан тухай эх сурвалж мэдээллээ.

 Амиа алдсан иргэдийн бичиг баримтыг БНХАУ-аас авчруулжээ

 Амиа алдсан иргэдийг БНХАУ-ын иргэд байсныг шинжээчдийн дүгнэлтээр тогтоогоод байгаа. Гэхдээ хохирогчид бичиг баримт байхгүй байсан тул Хятадын консултай холбогдож бичиг баримтынх нь хуулгыг авчруулан баримтжуулжээ. Одоогоор гэмт хэрэгтнүүд ямар шалтгаанаар тэдний аминд хүрсэнийг тодруулахаар Улаанбаатар хотын цагдаагийн газрын алба хаагчид ажиллаж байна. Гэхдээ хэргийн газраас 210 сая төгрөг алга болсон тухай мэдээлэл байгаа. Тэгэхээр гэмт этгээдүүд шунахайн сэдлээр үгсэн тохиролцож, уг хэргийг үйлдсэн байж болзошгүй гэх таамаг байгаа юм.

 Б.Золбоо 

Эх сурвалж: Zaluu.com