Байгаль орчин, аялал жуулчлалын сайдын тушаалаар 2023 оны гуравдугаар сарын 20-ны өдрөөс эхлэн тусгай хамгаалалттай газар нутагт нэвтрэх хураамжийн хэмжээг шинэчлэн тогтоосон.

Тусгай хамгаалалттай газар нутагт дархан цаазат газар, байгалийн цогцолборт газар, байгалийн нөөц газар, байгалийн дурсгалт газар хамаарна.

Харин шинэчлэгдсэн тарифаар тухайн газрын төрлөөс хамаарч иргэд 1000-5000 төгрөг, мотоцикл 1000-5000 төгрөг, суудлын автомашин 3000-15,000, автобус 10,000-120,000, ачааны машин 10,000-50,000, нисдэг тэрэг болон онгоц суудлын тооноосоо хамааран 60,000-500,000 төгрөг байхаар тусгасан.

Нийслэлийн иргэдийн хамгийн ойрхон бас олноор зорин очдог Горхи-Тэрэлж нь байгалийн цогцолборт газарт хамаарах бөгөөд тус тушаалын дагуу нэвтрэх тасалбарын үнэ дараах байдлаар шинэчлэгдэн мөрдөгдөж байна.

Үүнд,

Иргэн гурван мянга

Мотоцикл гурван мянга

Суудлын автомашин есөн мянга

Автобус /12 хүртэл хүний суудалтай/ 30 мянга

Автобус /12-24 хүний суудалтай/ 54 мянга

Автобус /24-өөс дээш хүний суудалтай/ 72 мянган төгрөг.

Иргэд Тэрэлж рүү орохдоо банкны бүх төрлийн карт, бэлэн мөнгө болон QR код уншуулж гүйлгээ хийх, и-баримт авах бүрэн боломжоор хангажээ.