Өнгөрсөн амралтын өдөр “Босоо хөх Монгол” бүлгэмийн залуус, дэмжигчид Бурхан Халдун ууланд аялахдаа тус хайрханд залбирч явсан хэсэг залууст эр бяраа гаргасан талаарх видео бичлэг сошиал ертөнцөөр тарж багагүй хэл ам дагуулав. Түүнтэй холбогдуулан Улсын харцага Г.Ганхуяг болон “Босоо хөх Монгол” бүлгэмийн гишүүдэд эрүүгийн хэрэг үүсгэн шалгаж эхэлсэн мэдээлэл бий. Улсын харцага Г.Ганхуягтай холбогдож энэ талаар тодрууллаа.

-Танд эрүүгийн хэрэг үүсгэн шалгаж эхэлсэн мэдээлэл тарлаа. Ямар үндэслэлээр шалгаж байгаа вэ?

-Намайг болон биднийг шалгаагүй ээ. Мэдээж, бидний талаар олон нийтэд буруу ташаа мэдээлэл хүргэх зорилгоор ийм зүйл тарааж байгаа байх.

-Нэг ч удаа цагдаагаас дуудаагүй юу?  

-Дуудаагүй байна. Дөрвөн сарын нэгэн л гэж бодож байна.

-Цагдаагаас дуудаж шалгаагүй байхад ийм мэдээлэл цацагдсан нь ямар учиртай юм бол?

-Үндэсний үзэлтэй, эх орондоо хайртай залуусыг айлгах гэж ийм мэдээ цацаж байгаа юм. Уул л бол адилхан уул биш шүү. Эцэг хаадын алтан яс онголсон, Монголын агуу нууц тэнд байгаа болохоор ариун дагшин газар гээд харь хүн очихыг хориглосон байдаг. Харь хүн л бол харь хүн шүү дээ, яагаад ойлгодоггүй юм бэ.

-Та хэр үндсэрхэг үзэлтэй вэ?

-Би үндэсний үзэлтэй хүн. Энэ бол манайх шиг жижиг үндэстний хувьд маш зөв үзэл юм. Дээдсээс өвлөгдөж ирсэн биет ба биет бус Үндэсний их Өв соёл, уламжлал, газар нутгаа хайрлаж хамгаалах, үр хүүхдүүддээ хадгалж өвлүүлж үлдээх, хөгжүүлэх, эв нэгдлийг эрхэмлэж гадаадын хөгжингүй орнуудаас суралцах, улс орноо том гүрнүүд эзэлж уусгахаас хамгаалах дархлаа тогтоох үзэл юм.

-Тэгвэл үндсэрхэг үзэл гэдэг нь?  

-Нацист буюу үндсэрхэг үзэл бол маш жигшүүрт үзэл. Гадаад хүн, гадны соёлыг үзэн ядах, үндэстэн хооронд талцуулж хагаралдуулах зорилготой. Манайд байгаа нацистууд бол хялбар аргаар мөнгө олох гэсэн зорилготой жижиг гарын дээрэмчин, шорончин, гудамжныхан голдуу залуус байдаг. Эднээс болж гадаадын хөрөнгө оруулагчид, жуулчид Монгол улсыг дэлхийд буруугаар сурталчилдаг.

-Та бүхнийг Бурхан Халдунд мөргөж явсан өвөрмонгол эрийг өвдөг сөгдүүлэн зодож дарамталсан гэсэн. Яг юу болсон юм бэ?

-Гуравдугаар сарын 28-нд амралтын өдрөөр найзуудтайгаа, “Босоо Хөх Монгол”-ын андуудтайгаа Монгол түмний минь өвөг дээдсийн их онгон шүтээн, Онон Хэрлэн Туул гурван голын эх, дээдсийн маань их хориг Бурхан Халдун хайрханд аялж, Дунд овоонд тахилга ёслол үйлдэж, сүслэн залбирч хийморио сэргээсэн. Тэнд бас өөр олон залуу явж байсан. Тэдний нэг гэнэт “Энд хятад хүн явж байна” гэхэд бид очсон. Хайрханд мөргөж явсан хүнийг барьж аваад, зодож байхтай таарсан. Тэр нь өвөрмонгол хүн байсан. Бид зодох нь битгий хэл харин ч тэднийг салгасан шүү. Гэхдээ тэр өвөрмонгол паспорт, бичиг баримтүй явсан нь онцгүй байсан. Ямар ч тагнуул туршуул юм билээ.   

-Тухайн үед өвөрмонгол эрийг өөр залуус зодсон гэлээ. Тэд хэн байв?

-Гадаадынхныг үгүйсгэдэг, Гитлерийн хувцастай “Ногоон хас” бүлгэмийн залуус байсан.   

-Бурхан Халдунаас тэр өдөр портер хог ачсан гэж сонссон?

-Тийм, маш их хог хаяж, хадаг яндар уясан байсан. Бид тэр өдөр хайрханаа цэвэрлэж, портер дүүрэн хог ачсан. Ухамсар хийморьгүй хүмүүсийн амьд модонд уясан хийморийн дарцаг хадгуудыг огтолж хаялаа. Нэг ч мод суулгаж арчилж үзээгүй юм байж олон модыг энэ мэтээр тарчлааж боомилон үхүүлсэн байна. Хэзээ байтлаасаа монгол хүн ингэдэг байлаа. Энэ бол жам бус зүйл шүү дээ.

-Гитарчин Өлзий-Орших цахим хуудастаа энэ талаар тайлбар хийсэн байсан. Та түүнтэй санал нэг байна уу?

-Санал нэг байна. Монголд хуульчлагдаагүй нь хамаагүй, бид уламжлалаа дагах ёстой. Гадны хүн оруулахгүй байх ёстой. Босго тэнгэрийн даваанаас нааш харийн хүний мөр бүү гарга гэдэг. Бурхан Халдун уулыг Хиад боржигны өвөг Бодончарын үеэс тахиж, Чингис хааны үед Хамаг Монголын хийгээд Монголын их эзэнт гүрний Сүлд уул болгон тайж байсан түүхтэй. Хамаг Монгол Улсын хэзээний уламжлалт өлгий газар, тухайлбал Бурхан Халдун уул болон гурван мөрний эхэнд бусдыг бүү нутаглуултугай хэмээн онголон дархалж, хаадын шарилын орд бүхий ихсийн газар Их хориг гэх болсон.

-Бурхан Халдуныг хамгаалдаг хүмүүс байдаг биз дээ. Тэдэнтэй уулзсан уу?

-Бид Бурхан Халдуны байгаль хамгаалагчтай уулзсан.

-Юу гэж хэлж байна вэ? 

-Машинтай хүмүүс ирээд, жолооч нь бууж ирж мөнгөө тушаагаад гарсан. Машин тэргийг нь шалгаж үзсэнгүй гэж байсан. Хариуцлагатай байж шалгаж үзэх хэрэгтэй. Ямар тагнуул яаж яваа юм билээ. Алт хайх хэрэгслээ тавиад яваа ч юм билүү.

-Та “Босоо хөх Монгол” бүлгэмийн гишүүн үү?

-Би бүлгэмийн хүндэт гишүүн. “Босоо хөх Монгол” бүлгэмийн залуус харин ч зөв юмны төлөө яваа гэж боддог. Аль нэг улс төрийн нам эвслээс хамааралгүйгээсээ тэдний гүтгэлгэд өртөж, тэдний мэдээллээр нийгмийн тархи угаагдаж байна.       

-Бямбадорж гэж залууг зодож танхайрсан гэсэн мэдээлэл гарсан?

-Тэр хүнд бид гар ч хүрээгүй. Өөрөө цохиж, хувцсыг нь урчихаад, газар унаад, цагдаа дуудсан. Одоо манай залуусыг сэжигтнээр татан шалгаж байна. Цаанаасаа “Босоо хөх Монгол” бүлгэмийнхнийг нухчин дарах даалгавартай. Бямбадорж нар шиг нацист хувцас өмсөж, хоолны газар дээрэмдэж хоол олж идээд ч яах билээ дээ. Овоо мөнгө авсан болоод ингэж яваа байх. Цагдаад байхдаа хулгай хийж шоронд орсон хүн. Сая цагдаа дээр очоод “Эд нар намайг муухай хараад байна” гээд өмдөндөө шээсэн гэж байсан. Ийм жүжигчин байж болохгүй шүү дээ.

-Хас тэмдэг зүүсэн залуус байдаг санагдаж байна?  

-Уг нь хас тэмдэг эерэг энергийн эргүүлэг шүү дээ. Гэтэл болсон болоогүй хүмүүс хэрэглээд, Монголыг гадаадын хөрөнгө оруулагчдад муухай харагдуулж, Монгол Улсын нэр хүндийг унагах гэсэн оролдлого хийж байна.    

-Эрх чөлөөний талбай дээр суулт зарласантай холбогдуулан танай бүлгэмийн гишүүдийг шалгаж эхэлсэн мэдээлэл бий. Хичнээн хүн шалгагдаж байгаа вэ? 

-Дөрвөн гишүүнд эрүүгийн хэрэг үүсгэн шалгаж байгаа.

-Та бүхнийг ч дуудаж шалгахгүй гэх баталгаа байхгүй бололтой?

-Одоогоор дуудаагүй байна. Дуудвал дуудсан цагт нь очно. Цагдаагийн дарга нарын ард МАНАН байгаа. Тэгэхээр хэнд үйлчлэх нь тодорхой. Гэсэн ч бидэнд буцах зам байхгүй. Айж ичих зүйл байхгүй учраас эцсээ хүртэл тэмцэнэ.

-Хаврын синдром эхэлж, бүлгэм хөдөлгөөнүүд хэт туйлширч байна гэж олон хүн сэтгэгдэл бичиж байна?

-Тэр олон комментыг олон хүн бичдэггүй. Нэг хоёр хүн компьютерийн ард суугаад бичдэг, цалин авдаг болохоор.

-Та бүхний үйл ажиллагааг үгүйсгэх хүн ч цөөнгүй байдаг?

-Ард түмний амьдрал хүнд байна. Монголд эрлийз хурлийзууд замбараагаа алдлаа. Үндэсний гэх шинж чанарыг алдагдуулж, Монголыг том гүрнүүдэд уусгах бодлого явагдаж байна. Би хувийн бизнес хийдэг. Зам тавьж, барилга барилаа. Мөнгийг нь өгөхгүй байна. Аргагүйн эрхэнд зээл авахад хүргэдэг. Монголбанк, Сангийн яаманд мөнгө байна. Яагаад гаргаж өгөхгүй байна вэ? Монголчуудыг хүчээр ядуу байлгах гэж тэр. Зээлсэн мөнгөний хүүд идэгдээд, өдрөөс өдөрт амьдрал улам дордож байна. Тиймээс засаг төрдөө гомдолгүй яах вэ. УИХ-д 21 эрлийз хурлийз буюу харь хүн байна. Энэ хүмүүстэй хэн тэмцэх вэ? Дарга нар ажлаасаа халагдахаас айж үгээ хэлж чаддаггүй. Бид засаг төрдөө гомдсондоо ард түмний төлөө ийм алхам хийж байна.

Э.ЭНХ-ЭРДЭНЭ

www.medee.mn