Дэлхийн эмч нарын өдөрт зориулан зохион байгуулсан “Эмч танаараа бахархъя” хүндэтгэлийн үйл ажиллагаа өчигдөр болж хот хөдөөгийн эрүүл мэндийн байгууллагын төлөөлөл 800 орчим хүн оролцлоо.
Энэ үеэр Эрүүл мэндийн сайд С.Чинзориг “Эмч танаараа бахархъя” хүндэтгэлийн арга хэмжээнд оролцож буй зочид төлөөлөгчдөд хандан хэлсэн талархлын үгэндээ эрүүл мэндийн салбарт хийж хэрэгжүүлж эхэлсэн ажлууд, авч буй арга хэмжээ, баримталж буй бодлогынхоо талаар товч танилцуулсан юм.

Тэрбээр эрүүл мэндийн салбарын эрх зүйн орчинг шинэчлэх, гүйцэтгэлийн санхүүжилтийг боловсронгуй болгох, салбарын цахим шилжилтийг эрчимжүүлэх, эмийн чанарыг сайжруулах, үнийн зохицуулалт хийх, эмнэлгийн тусламж үйлчилгээний талаар тулгамдаж буй асуудлуудыг товч тодорхойлоод эрүүл мэндийн салбарын эмч, эмнэлгийн ажиллагсдын нийгмийн баталгааг хангах үүднээс дараах ажлуудыг хийж эхлээд байгаагаа дуулгалаа. Тухайлбал,
-Гүйцэтгэлийн санхүүжилтээр ялгавартай олгогдож байгаа цалин хөлсийг нэмэгдүүлэх бодлогын тохируулгуудыг хийж үндсэн цалинг нэмэгдүүлэхээр ХНХЯ-ны газрын даргаар ахлуулсан ажлын хэсэг байгуулан цалин хөлс нэмэгдүүлэх, судалгаа тооцоолол гаргах ажлыг эхлүүлээд байна. Эхний ээлжинд орон нутаг, сум, тосгоны ЭМТ-ийн эмч, эмнэлгийн мэргэжилтний цалинг 30 хувиар нэмэгдүүлнэ.
-Нийгмийн баталгааг хангах үүднээс эмч, эмнэлгийн ажилтнуудыг ипотекийн зээлээр орон сууцжуулах гэрээг Худалдаа хөгжлийн банктай байгуулахаар болсон.
-Ур чадварыг үнэлэх, урамшуулах журмыг шинэчлэн баталж байна.
-Эрүүл мэндийн байгууллагын ажилтан, албан хаагчдын хариуцлагын даатгал, эрсдлийн даатгалын тогтолцоог боловсронгуй болгох, үйл ажиллагаанд нэвтрүүлэхээр санхүүгийн зохицуулах хороотой хамтран ажлын хэсэг байгуулан хууль өөрчлөлт оруулах ажлыг эхлүүлээд байна.
-Эмч, эмнэлгийн мэргэжилтний эрхийг хамгаалах, тэдний аюулгүй байдлыг хангах, аливаа эрсдэлд орохоос сэргийлсэн эрх зүйн зохицуулалтуудыг хийхээр ажиллаж байна гэсэн юм.