Францын иргэн 39 настай Рот Николас (Roth Nicolas), 35 настай Аннк (Annk) нар өөрийн 7 настай хүү Ное (Noe), 6 настай хүү Том (Tom) нараа дагуулан унадаг дугуйгаар дэлхийг тойрох гэж байна. Тэд Францаас Москва хүртэл нисч, Москвагаас Монгол хүртэл гал тэргээр иржээ. 

Улмаар тавдугаар сарын 10-ны өдөр Улаанбаатар хотоос Дэлхийг тойрон аяллаа эхэллээ. Тэдний Монголд хийх аялал хоёр сарын турш үргэлжлэх бөгөөд Өвөрхангай, Хархорин, Архангайн Цэцэрлэг хот, хойшоо Ороохын даваагаар даваад Мөрөн хотоор дамжин, Хөвсгөл нуур хүрснээр визний хугацаа нь дуусах аж. Тэд өдөрт 35 км газар явах төлөвлөгөөтэй гэнэ. 

Аяллын маршрут ёсоор Хятад улсад 45 хоног, Казакстан улсад 15 хоног, Кыргызстан улсад 45 хоног, дараа нь буцаад Хятад улсын Түвэд ороод Балба улсад очих аж. Мөн Балбад хүүхдийн сургууль барих ажилд таван сарын хугацаанд туслах юм байна. 

Нөхөр Рот Николас нь Францад “Omega” цагны үйлдвэрт ажилладаг бол эхнэр Аннк нь сувилагч мэргэжилтэй ажаж. Тэд энэхүү аяллаа Афганистан, Пакистанаас эхлэхээр төлөвлөж байсан ч найзынхаа зөвлөснөөр манай улсаас эхэлж байгаа гэнэ. 

Тэд шөнөдөө майхандаа хонодог. Дугуй бүр 26 килограмм ачаатай, ачаандаа дөрвөн хүний майхан, гудас, хөнжил, бензинээр ажилладаг плитка, хоол хүнс бусад зүйлсээ ачсан, гар чийдэн бусад зайгаа цэнэглэх нарны зайн цэнэглэгчтэй. Хаана явж байгаагаа тодорхойлох GPS төхөөрөмжтэйгээр аяллаа үргэжлүүлж байна. 
Тэдний блог хаяг нь: radicalaventure.over-blog.com

Эх сурвалж: