Улаанбаатар хотын Хүүхдийн театрын уран бүтээлчид Олон улсын хүүхдийн эрхийг хмагаалах өдөрт зориулан “Галт чулууны нууц” хөгжимт жүжгийг маргааш УБ паласын концертын их танхимд болно. Жүжгийн зохиолч найруулагчаар “Гэгээн муза” наадмын “Хүүхдийн жүжгийн шилдэг найруулагч” МУСТА Б.Хишигзаяа, тайзны зураачаар Б.Лхагвадорж зэрэг шилдэг уран бүтээлчид ажиллаж байна.
Багачуудын хайртай баатар Ногун ер бусын ид шидтэй галт чулууг хайрлаж хамгаалах үүрэгтэй ч муу санаатан савдагт чулуугаа алдсанаар жүжиг эхэлдэг. Ногун найз Инжир болон Бөөдий, Өдийхөн, Маази зэрэг ойн амьтдын хамтаар галт чулууг буцаан олж авч, хамгаалахаар тэмцэх юм.
Хүүхдүүд зурагтаар харж, номноос уншиж байсан баатруудтайгаа уулзаж, хамтдаа дуулж бүжиглэх ховорхон боломж ийнхүү тохиож байна.
Тасалбар 25 болон 20 мянган төгрөгийн үнэтэй бөгөөд тасалбар бүрт Ногун комикс болон олон төрлийн амттанаар дүүрэн бэлэгтэй. Мөн азтай хүүхдэд өхөөрдөм хөөрхөн гөлөг, бүжин бэлэглэх аж.
Ж.Болор
Эх сурвалж: “Монцамэ” агентлаг
