Спорт хувцасны үйлдвэрлэлээр дэлхийд тэргүүлэгчдийн нэг Германы Адидас брендийнхэн Колумб улсын нэрийг буруу бичиж, маш том алдаа гаргасандаа уучлалт хүсчээ. Колумб улсын нэрийг англи үсгээр "Colombia" гэж бичдэг бол Адидасынхантус улсын хөлбөмбөгийн багийн өмсгөлийн сурталчилгааны хуудсан дээр нь "Columbia" гээд биччихсэн байна. Ингэж бичсэн нь Колумб улсыг бус АНУ-ын Колумб хотыг заасан утга илэрхийлдэг юм.

Реал Мадридийн Жеймс Родригез болон Колумбын нэр хүндтэй хөлбөмбөгчдийн зураг бүхий уг сурталчилгааны хуудсыг Копа Америка тэмцээнд зориулан хийсэн ч асар том алдаа гарсныг онлайн хэрэглэгчид олж тогтоож, дуулиан болгон дэвэргэсэн байна. Тэдний зүгээс Адидас компанийн энэхүү алдааг уучлах аргагүй хэмээн хурцаар шүүмжилж буй юм.

Хэрэг явдал мандсаны дараа Адидасын хэвлэлийн төлөөлөгч мэдэгдэл гаргаж, "Бидний зүгээс Колумбын хөлбөмбөгийн холбоотой хамтран ажилладаг бөгөөд гүн хүндэтгэлтэйгээр ханддаг юм. Энэ удаад бичиг үсгийн алдаа гаргасандаа хүлцэл өчье. Тиймээс, алдаатай сурталчилгааны хуудсыг буулгаж, засч залруулсныг нь нэн яаралтай тараан байршуулна" гэв. Мөн түүний мэдээлснээр алдаатай зурагт хуудас зөвхөн АНУ-д л тараагдсан аж.

С.Дамдин