Оюу толгойн хөрөнгө оруулалт гацсан хэвээрээ байгаа. Далд уурхайн хөрөнгө оруулалтыг шийдэхийн тулд ТЭЗҮ-г шинэчлэн боловсруулсан. Гэвч эцсийн шийдэл гараагүй байна. Төслийг удирдаж буй Рио Тинто компани далд уурхайн төсөлд 4.2 тэрбум доллар нэмж авна гэсэн. Үүнийг манай зарим эдийн засагчид “Монголын зээлээр авсан 34 хувь дээр нэрмээс болох мөнгө. Оюу толгойн борлуулалт Монголын хилийн гадна явагдаж байгаа тул бидэнд тусах ашиг тун бага. Бараг байхгүйтэй адил” гэж байгаа юм. Ер нь Оюу толгойгоос ил аргаар авч урд хөрш рүү зөөж байгаа зэсийн хүдэр, алт, бусад дагалдах металл элементүүдээс орох орлого одоогоор бидэнд падлийгүй бололтой. Тэгээд ч ашгийн тооцоо нь эргэлзээтэй байна. Энэ талаар УИХ-ын гишүүн С.Ганбаатарын гаргасан судалгааг харвал хасах баланстай тооцоо гарч ирээд байгаа аж. Тэрбээр өөрийн цахим хуудсанд “Оюу толгойгоос өдөр бүр 5.4 сая доллар гарч байна. Харамсалтай нь энэ мөнгө Монголын банкаар дамждаггүй. Асар өндөр хүү, менежментийн төлбөрт...” гээд манай хилээр өдөрт гарч буй баялгийн мөнгөн дүнг хүснэгтээр үзүүлсэн байна. Энд алдагдал нь 2 сая орчим даллор гэсэн байх юм. Үнэн бол аймаар тоо ажээ.
Б.Баяр
Эх сурвалж: Tumen.mn
