Татварын буцаан олголтын хоёрдугаар ээлжийг энэ сарын 25-наас олгохоор хүлээгдэж байгаа болохыг Татварын Ерөнхий Газраас мэдээллээ. 2014 оны Хувь хүний орлогын албан татварын тайлангаар нийслэлийн хэмжээнд нийт 33.1 мянган иргэнд 24.5 тэрбум төгрөгийг албан татварын буцаан төлөлт хэлбэрээр олгохоор болсон байна.
Эхний ээлжинд нэгдүгээр сарын 20-ноос өмнө татварын албанд тайлангаа ирүүлсэн 11.6 мянган татвар төлөгчийн 9.5 тэрбум төгрөгийн буцаан төлөлтийг баталгаажуулж, нийслэлийн Төрийн сангаас өнгөрсөн сарын 6-нд буцаан олгожээ.Харин хоёрдугаар ээлжинд буюу нэгдүгээр сарын 20-ноос хоёрдугаар сарын 15-ны хооронд тайлангаа өгсөн иргэдийн тайланг шалгасны үндсэн дээр энэ сарын 15-наас буцаан олголтыг олгож эхлэх байсан ч ирэх долоо хоног хүртэл хойшилжээ. 2014 оны татварын хөнгөлөлт чөлөөлөлтөд хамрагдахаар улсын хэмжээнд 71.9 мянган иргэн тайлангаа ирүүлсэн бөгөөд үүнд 44.1 тэрбум төгрөгийн буцаан олголт олгохоор байгаа юм байна.
